اسلام آباد۔ 16 نومبر (اے پی پی) بنجائی وزیر اقتصادی امور سردار ایاز صادق پارینے کہ پاکستان نا راجی و اقتصادی شونداری ٹی جہانی بینک انا کمکاری نا اہم ءُ کڑد اس مسنے و دا کڑد آخبت اٹ ہم بایدے برجاسلے۔ اوداہیت ءِ چار شنبےنادے آ داڑے جہانی بینک انا علاقائی ڈائریکٹر سویلی ایشیا جان اے روم تون اوڑدہی ٹی گپ وتران کرسا پارے۔ داوخت آ پاکستان اٹی جہانی بینک انا کنٹری ڈائریکٹر ناجی بن حسائن ہم ساڑی ئسک۔ بنجائی وزیر اقتصادی امور جہانی بینک انا کنڈآن پاکستان نا پدریسہ کمکاری نا ستاءِ کرے و پارے کہ 1950 آن ہلیس داتم اسکان جہانی بینک پاکستان ءِ 31.1 ارب ڈالر نا مالی کمک فراوان کرینے۔ اوپارے کہ پاکستان نا راجی و اقتصادی شونداری ٹی جہانی بینک انا کمکاری نا اہم ءُ کڑد اس مسنے و دا کڑد آخبت اٹ ہم بایدے برجاسلے۔ وزیر اقتصادی امور ساڑی آ نوکاپ آن پد امداد و بحالی نا کاریم تیٹی جہانی بینک انا کمکاری نا ستاءِ کرے و پارے کہ پاکستان مشکل نا داساہت اٹی جہانی بینک انا کمکاری ءِ قدر انا نظر اٹ ہرک۔ اوپارے کہ داوخت آ جہانی بینک بنداوی پنجر ، کشت وکشار ، خلقی و شاری شونداری، انسانی سرمایہ، راجی خذمت و پائیدار نمو ٹی پاکستان نا کمکاری ءِ کننگ ءِ۔ جہانی بینک انا علاقائی ڈائریکٹر وزارت اقتصادی امور نا گچین و فعال کڑد انا ستاءِ کرے۔ اوڑدہی ٹی پاکستان اٹی جہانی بینک انا آخبت نا ڈٹ سندھ و بلوچستان اٹی نوکاپ آن پد بحالی و پوسکن تفنگ نا ڈٹ آتا جاچ ءِ ہلنگا۔ اودا ڈٹ آتیا ترندی اٹ عملدرآمد کن رابطہ کاری ءِ گچین کننگ آ زور شاغا۔ بنجائی وزیر پارے کہ دا رداٹ وزارت اقتصادی امور تینا وڑوڈول ءِ بدل کرینے، دا ہیت ءِ پک کننگ انگ ءِ کہ وزارت اقتصادی امور بیرہ معاہدہ غاتیا دستخط کپ بلکن دا معاہدہ غاتیا ترندی اٹ عملدرآمد ءِ ہم پک کے۔ وزارت اقتصادی امور داہیت ءِ ہم پک کننگ ءِ کہ ڈٹ آتا گچین چاروکی مرے و فنڈ آتا گچین و جوان کاریم اٹ اتنگ ءِ پک کننگ مرے۔ اوپارے کہ درملکی کمکاری اٹ چلینگوک آ ڈٹ آتا چاروکی کن رابطہ کاری نا رداٹ سٹیرنگ کمیٹی اس جوڑ کننگانے۔ داوخت آ وزارت اقتصادی امور نا سیکرٹری پارے کہ تاخیر نا گواچی ڈٹ آتیا ترندی اٹ پیش رفت کن گام گیج کننگک۔ اوپارے کہ دامسخت کن وزارت اٹی وڑوڈول اس مون آ ایسونن۔ سیکرٹری اقتصادی امور پارے کہ ڈٹ آتیا ترندی اٹ عملدرآمد نا بابت وزارت اقتصادی امور نا ٹیم جہانی بینک انا ٹیم اتون گچین رابطہ ٹی ءِ۔
