اسلام آباد۔ 16 نومبر (اے پی پی) یورپی یونین نا ملک آتیٹی کاریم کروک آ پاکستانی تا زرراہی تس اٹی برجامالی سال انا اولیکو 4 تُو تیٹی سالانہ بنداو تیا 11.1 درسد نا کمتی ریکارڈ کننگانے۔ اسٹیٹ بینک آف پاکستان (ایس بی پی ) نا کنڈآن دابابت جاری کروک حساب وکتاب نا رداٹ جولائی آن اکتوبر اسکان نا مد اٹی جرمنی، فرانس، نیدر لینڈ، سپین، اٹلی، یونان ، سویڈن، ڈنمارک ، آئر لینڈ و بیلجیئم اٹی کاریم کروک آ پاکستانیک 1.061 ملین ڈالر نا زرمبادلہ ملک آ مون تسر ہرا تدوک آ مالی سال انا ہندا مد انا مقابلہ ٹی 11.1 درسد کم ءُ۔ تدوک آ مالی سال انا ہندا مد اٹی یورپی یونین نا باسک ملک آتیٹی کاریم کروک آ پاکستانیک 1.193 ارب ڈالر زرمبادلہ ملک آ گدریفیسر۔ اکتوبر اٹی یورپی یونین آن زرراہی تس نا کچ 232.7 ملین ڈالر ریکارڈ کننگا ہراستمبر اٹی 259.6 ملین ڈالر و تدوک آ سال اکتوبر اٹی 295.5 ملین ڈالر ریکارڈ کننگاسر۔ برجامالی سال انا اولیکو چار تُو تیٹی سمندر پارپاکستانی تا زرراہی تس اٹی سالانہ بنداو تیا 8.6 درسد نا کمتی مون آ بسنے۔
