اسلام آباد۔ 15 نومبر (اے پی پی) صدر مملکت ڈاکٹر عارف علوی پاکستان و سربیا نا نیام اٹ ہڑتوم آ کنڈآتا واپاری کچ اٹی خاطر خواہ ودکی کننگ نا گرج آ زور شاغسا پارینے کہ ہڑتوم آ ملک آتا نیام اٹ صنعت و واپار ، قابل تجدید توانائی تون اوار چندی بشخ آتیٹی کمکاری نا کثیر وارخواہی ساڑی ءِ۔ ایوان صدر نا پریس ونگ انا رداٹ داخیال آتا درشانی ءِ او سربیا ٹی پاکستان نا پندار سفیر علی حیدر الطاف تون گپ وتران اٹی کرے ہرا اوڑتون سے شنبےنادے آ داڑے ایوان صدر اٹی اوڑدہی کرے۔ صدر مملکت پارے کہ پاکستان و سربیا نا نیام اٹ واپاری و اقتصادی کمکاری نا گمان تیان پورو وڑاٹ بایدے فائدہ دوئی کننگے، ہڑتوم آ ملک آتا نیام اٹ واپاری سرجزآتے مون آ دننگ نا گرج ءِ۔ اوپارے کہ پندار سفیر کاروباری و واپاری رابطہ غاتے برجاتخنگ و ہڑتوم آ ملک آتا چیمبر ز آف کامرس نا نیام اٹ کمکاری ءِ ودفنگ نا کوشست کے۔ ڈاکٹر عارف علوی پارے کہ پاکستان نا سفیر ہڑتوم آ ملک آتا نیام اٹ ہڑتوم آ کنڈآتا دورہ غاتا کچ ءِ ودفنگ کن کاریم کے وخت اس کہ بڑزکو تکنیکی تعلیم، آئی ٹی و دودوربیدگ تون اوار چندی بشخ آتیٹی کمکاری نا پوسکن ءُ کسر بایدے پٹنگے۔ صدر مملکت پارے کہ پاکستان اٹی زرکاری کن سازگار چاگڑد ءِ، پاکستان و سربیا نانیام اٹ صنعت و واپار ، قابل تجدید توانائی تون اوار چندی بشخ آتیٹی کمکاری نا کثیر وارخواہی ساڑی ءِ، اسلام آباد اٹی سربیا نا مشن ملنگ آن کاروبارو السی رابطہ غاتیٹی آسانی مریک۔ صدر مملکت علی حیدر الطاف ءِ سربیا ٹی پاکستان نا پندار سفیر نا وڑاٹ تقرری آ مبارکبادی تس، او اومیت ظاہر کرے کہ پندار سفیر ہڑتوم آ ملک آتا نیام اٹ تعلقداری تے پین گچین کننگ کن پاکستانی مشن نا کوشست آتے پین ترند کیک۔
