اسلام آباد۔ 15 نومبر (اے پی پی) اسپیکر قومی اسمبلی راجہ پرویز اشرف پاکستان نا راجی و اقتصادی شونداری ٹی اقلیت آتا کڑد انا ستاءِ کرسا پارینے کہ چندی مذہب آتا پیروکار آتا نیام اٹ سیوت رواداری ، بین المذاہب ہم آہنگی و ایلمی ءِ پین مون آ دیک۔ سے شنبےنادے آ اسپیکر ہاؤس اٹی اقلیتی برادری نا اسہ ڈل اسے تون اوڑدہی ٹی اوپارے کہ آئین نا رداٹ پاکستان اٹ اقلیت آتے بریبر حق دوئی ءِ، آئین غٹ شاری تے بے پرخ رنگ و نسل بریبر حق فراوان کیک۔ حکومت تون ہم کوپہ پارلیمنٹ اقلیت آتا حق انا رکھ اکن مدام تینا کڑد ءِ ادا کیک۔ اوملک انا جم شونداری خاص وڑاٹ تعلیم، جان جوڑی، راجی آسودہی و بین المذاہب ہم آہنگی نا مون آ دننگ اٹ مسیحی برادری نا ستاکڑزوک خذمت آتا ستاءِ کرے۔ اسپیکر ملک اٹی جمہوریت نا سوگوی و جمہوری قدر انا مون آ دننگ اٹ اقلیت آتا کڑد انا ہم ستاءِ کرے۔ ڈل اٹی چرچ آف انگلینڈ لیورپول ڈاؤسیز نا راہشون روخ یوسف بھنڈر، پاکستان اٹی کرسچن لائرز ایسوسی ایشن نا صدر کاشف نعمت، امپلیمین ٹیشن مینارٹی رائٹس فورم نا چیئرمین سیموئیل مکسن و سیموئل پیارا تون گپ وتران کرسا اوپارے کہ ملک انا مثبت دروشم ءِ تالان کننگ نا گرج ءِ۔ اسپیکر ڈل آ زور شاغا کہ اقلیتی برادری نا حق انا رکھ و ملک اٹی اوفتے کن بریبر وارخواہی ودی کننگ اٹ ریاست نا تاریخی سرسہبی تے تالان کے۔ اسپیکر داہیت آ زور شاغا کہ اسہ ملک اس ہم ہمووخت اسکان شون ہلنگ کپک ہراتم اسکان کہ او تینا غٹ شاری تا گرج آتے پورو کپ۔ اوپارے کہ پاکستان اٹی اقلیت آک ننا ہمسایہ ملک اٹی اقلیت آتا مقابلہ ٹی ریاست آن بھاز است جم ءُ۔
