اسلام آباد۔ 15 نومبر (اے پی پی) ملتان سکھر موٹروے سویلی پنجاب اٹی سڑک آتا انفراسٹرکچر نا بابت بھاز بھلو ڈٹ اسے۔ پلاننگ کمیشن کمامدارآک “اے پی پی” ءِ پاریر کہ سی پیک نا دا ڈٹ آن امب، کیلا، اِلار ، کمند ، کرپاس و ایلو چندی کشاری اجناس آتے کراچی و لاہور نا بھلو مارکیٹ آتیٹی بھاز آسان رسینگ اس ممکن مسنے۔ سی پیک ڈٹ انا ایم ۔ 5 پروجیکٹ نا سوب آن ہزار آ ہندی واپاری ہند بحال مسنے، ملتان۔ سکھر موٹروے (ایم۔5) نا سوب آن نئے بیرہ ہڑتوم آ شار تا نیام اٹ سفر نا وخت ءُ پاس اٹی کمتی مرسا 11 گھنٹہ غان 4 گھنٹہ مس بلکن دا روٹ انا خڑک و مر انا آبادی نا زند انا آب آ ہم جوان ءُ اثراس تمانے۔ ملتان ۔ سکھر موٹروے پشاور آن کراچی ایکسپریس وے نا اہم ءُ سیکشن اسے ہرادے سی پیک نا فریم ورک انا رداٹ تفنگانے۔ ایم۔5 موٹروے نا سوب آن موٹروے تون گنڈوک علاقہ غاتا راجی۔ اقتصادی شونداری و شونہالی نا کسرآتا آوار مننگ تون اوار اوار چین و پاکستان نا تین پہ تینی تعلقداری پین سوگو مریک۔ ملتان شار نقد آور اجناس امب، اِلار وخت اس کہ سکھر ٹرانسپورٹیشن حب انا وڑاٹ بھاز اہمیت تخوک ءُ شار اسے۔ دا ڈٹ آن ہندی زرگزران و صنعت آک سوگو مریرہ۔ چائینہ کنسٹریکشن پاکستان کمپنی لمیٹڈ پاکستان نا 4500 مشین آپریٹرز و 2300 مینجمنٹ و ٹیکنیک اسٹاف ءِ ٹریننگ تسنے۔ ہندا وڑ کمپنی راجی۔ اقتصادی بشخ انا گچینی کن پاکستان نا 8 یونیورسٹی طالب علم آتے بڑزکو تعلیم کن چین نا وہان یونیورسٹی آف ٹیکنالوجی ٹی تعلیم نا فراوانی کن 1.5ملین یوآن ادا کرینے۔
