لاہور۔ 14 نومبر (اے پی پی) صدر مملکت ڈاکٹر عارف علوی پارینے کہ اینو نا دنیا ٹی علم آ تالان زرگزران شونداری نا کنجی ءِ، نیزگاری ءِ چٹفنگ کن ننے تعلیم و علم ءِ مون آ دروئی مریک، ورنا چین ننا نہادی میرات ءِ، ورناک ملکی تقدید ءِ بدل کننگ کیرہ، فارغ التحصیل طالب علم آتا زمواری ءِ کہ ملکی شونداری کن عملی میدان اٹ تینا پبی کڑد ءِ ادا کیر، داخیال آتا درشانی ءِ او منہاج یونیورسٹی نا کانووکیشن اٹی بطور مہمان خاص بشخ ہلنگ نا وخت آ تران کرسا کرے۔ صدر مملکت پارے کہ ماڈرن ایجوکیشن نا مون آ دننگ و شونداری کن شیخ الاسلام پروفیسر ڈاکٹر طاہر القادری نا خذمت ستاکڑزک، آب اٹ تعلیم و تربیت نا فراوانی و پٹ وپول نا مون آ دننگ نا سوب آن منہاج یونیورسٹی نجی تعلیمی بشخ اٹی اسہ گچین ءُ ودکی اسے۔ اوپارے کہ ننے اسلامی قدر ءِ مون آ تخسا راجی معیار و راج ءِ بدل کروئی ءِ۔ طالب علم آتون مخاطب مرسا صدر مملکت پارے کہ دانما زمواری ءِ کہ پاکسانی راج انا تکمیل ءِ کروئی ءِ و نما ڈگریک ہم دانا خواست کیرہ، ہنداخاطران نمے منہاج یونیورسٹی ٹی جوان تعلیم و تربیت تننگانے، نم خواری، ایمانداری و دیانتداری اٹ کاریم کبو ہندا علامہ اقبال نا کلہو ہم ارے ۔ اوپارے کہ داوخت آ ملک اٹی دونیم کروڑ چناک اسکول آتیان پیشن ءُ ای غٹ عالم دین و وزارت تعلیم نا مخلوق ءِ یکتا تولفنگ نا بناءِ کرینٹ تانکہ آؤٹ آف اسکول چناتے تعلیمی سرکل اٹ اتنگ مرے۔ عالم دینک پارینو کہ سہب آن پیشیم اسکان ننتون جاگہ ارے ہموڑے چناتے خوانفنگ ہم مریک۔
