لاہور۔ 14 نومبر (اے پی پی) صدر مملکت ڈاکٹر عارف علوی دوشنبےنادے آ پاکستان انسٹیٹیوٹ آف فیشن اینڈ ڈیزن لاہور نا دورہ ءِ کرے۔ صدر مملکت ءِ ادارہ ٹی تعلیمی سرجز ، کارکڑد و چندی بشخ آتیٹی تعلیمی آسراتی تابارواٹی حوال تننگا۔ دورہ ٹی خاتون اول بیگم ثمینہ علوی ہم صدر مملکت تون اوار ئسک۔ دورہ نا وخت آ صدر مملکت ڈاکٹر عارف علوی پارے کہ ورچوئل و آن لائن پلیٹ فارم آتا کمک اٹ پاکستانی آرٹس، فیشن، ڈیزین و ٹیکسٹائل مصنوعات آتے جہانی کہول آ درستی راستی و پذیرائی ترفنگ مریک۔ اوپارے کہ جامعہ غاک فارغ التحصیل طالب علم آتا کچ ءِ ودفنگ کن آن لائن و ورچوئل تعلیم آ چکار تخر ہراڑان طالب علم آتے کم وخت اٹی راج انا فعال بندغ جوڑ کننگ کن شارٹ کورس آتا کمک ہلنگ مریک۔ صدر مملکت نا مستی پاننگ ئس کہ مچ آ دنیا ٹی مارکیٹ نا گرج آتے پورو کننگ کن گونڈ مدتی کورس آتا کمک اٹ تعلیم تننگ انگ ءِ، دنیا ٹی چندی بشخ آتیٹی ایسوسی ایٹ ڈگری ہولڈر و سرٹیفکیٹ ہولڈر افرادی قوت ءِ اولیت تننگ انگ ءِ۔ اوپارے کہ جامعہ غاک طالب علم آتا کچ ءِ ودفنگ کن آؤٹ آف باکس سوچ وپوسکنی آ تالان وڑوڈول ءِ تینا کیر، شون ہلوک ملک آتا جامعہ غاتیٹی بھلو کچ اسے آ آن لائن تعلیم تننگ انگ ءِ ، آن لائن تعلیم نا کمک اٹ خڑچ آتے کم کننگ مریک، کم وخت اٹی زیات طالب علم آتے کسبکار کننگ مریک۔ صدر مملکت پارے کہ جامعہ غاک ورچوئل و آن لائن پلیٹ فارم آتیا تینا ساڑی گری ٹی ودکی کیر۔ صدر مملکت پاکستان انسٹیٹیوٹ آف فیشن اینڈ ڈیزن نا دورہ ٹی چندی فیشن مصنوعات آتا نمائش نا ہم جاچ ءِ ہلک۔ اوپاکستان انسٹیٹیوٹ آاِنت فیشن اینڈ ڈیزن نا انڈسٹری ، جہانی جامعہ و ادارہ غاتون رابطہ غاتا ہم ستاءِ کرے۔
