اسلام آباد۔ 14 نومبر (اے پی پی) وزیر مملکت امور خارجہ حنا ربانی کھر پارینے کہ پاکستان یورپی یونین تون آخبت اٹ کمکاری ءِ پین مون آ دننگ نا خواہندار ءِ، پاکستان تون یورپی ملک آتیکن افرادی قوت تننگ کن گچین گمان ساڑی ءِ، غیرکانودی وڑاٹ پیشن نا ملک آ ہنوک آ تا برخلاف سخت گام گیج کننگ انگ ءِ۔ داخیال آتا درشانی ءِ او دوشنبےنادے آ داڑے وزارت خارجہ ٹی یورپی یونین نا کمشنر مائیگریشن اینڈ ہوم افیئرز یلوا جوہانسن تون اوار اسیجائی پریس کانفرنس آن تران کرسا کرے۔ وزیر مملکت امور خارجہ پارے کہ کانودی وڑاٹ پیشن نا ملک آ ہنوک آتیکن آسانی ودی کننگ کن کوشست برجاءِ، غیرکانودی ہِننگ ءِ توننگ کن کانود سازی ہم کننگ اُن۔ اوپارے کہ پیشن نا ملک آ ہنوک آتیکن چندی بشخ آتیٹی کسبی مہارت ءِ مون آ دننگ اُن۔ وزیر مملکت امور پارے کہ مہاجر آتا بابت پاکستان و یورپی یونین نا نیام اٹ کمکاری ساڑی ءِ۔ داوخت آ یورپی یونین نا کمشنر مائیگریشن اینڈ ہوم افیئرزیلواجوہانسن پارے کہ پاکستان یورپین یونین کن اسہ و تزویراتی شریدار ءِ، نن پاکستان تون اواری اٹ بھاز انگا بشخ آتیٹی نمان کاریم کننگ کینہ، کسبکار افرادی قوت نا یورپی ملک آتسکان رسینگ ءِ آسان کننگ نا گرج ءِ۔ اوپارے کہ انسداد دہشت گردی ٹی پاکستان نا خذمت ستاکڑزک ، مہاجر آتا بابت پاکستان و یورپین یونین نا نیام اٹ کمکاری ساڑی ءِ، کمکاری اٹ انسداد منشیات نا بابت ہم اہم پیش رفت ممکن ءِ، یورپی ملک آتون چندی بشخ آتیٹی کسبکار افرادی قوت نا کمتی ءِ۔
