اسلام آباد۔ 14 نومبر (اے پی پی) بنجائی وزیر حوالکاری و شینکاری مریم اورنگزیب پارینے کہ پن انا ’’حقی آجوئی ‘‘ نا دروشم بے نقاب مسنے، عمران خان تینا سیاسی فائدہ غاتیکن بھلو گوازی اس کرے، قومی سلامتی ءِ خطرہ ٹی شاغا، پاکستان نا خارجہ تعلقداری تے بھس کننگ نا کوشست کرے، داسہ پاہک امریکی سازش والا ہیت چٹا، ’’اینو امپورٹڈ‘‘ و ’’رجیم چینج‘‘ نا دروغ انا بیانیہ غان دزکش مس، عمران خان داوڑ چلینگپک، نے ورندی تروئی تمک۔ دوشنبےنادے آ مسکوہی وزیراعظم عمران خان نا فنانشل ٹائمز ءِ انٹرویو آ تینا ردعمل اٹی بنجائی وزیر حوالکاری و شینکاری عمران خان ءِ مخاطب کرسا پارے کہ عمران خان !ا مریکی سازش نا بیانیہ ءِ پدپشت تخنگ آن ہیت ختم مفک، نے ورندی تروئی تمک، ہرابیانیہ غا نی مچ آ ملک اٹی بے چیٹی و دروغ تالان کریس، ورندی تننگ آن بیدس بیرہ دزکشی گنج اس اف۔ اوپارے کہ اینو بیرہ عمران آن سوج آخا بلکن عمران نا ہیت آ باورکروک آ و دروغ، ملکی فائدہ غاتون گوازی کروک آ فارن فنڈڈ فتنہ نا ہیت ءِ بنوک آتیکن ہم سوج انا نشان اسے۔ اوپارے کہ پارلیمان ، پاکستان نا فوج، ادارہ غاتے غدار گوندسا بیرہ داپاننگ آن ہیت ختم مفک کہ ” it’s behind me and it’s over “، داوڑآخاعمران خان!داوڑآخا۔ اوپارے کہ عمران خان تینا دروغ اکن آئینی عہدہ غاتیان آئین شکنی کرفے، عمران خان ملک ءِ تہس نہس کرسا اینو امریکی سازش نا بیانیہ غان دزکش مسنے، انت او تینا مخ تف آتے گنوک و ایٹ و میل سرپند کرینے؟۔ وزیر حوالکاری پارے کہ عمران خان امریکی سازش، امپورٹڈ حکومت و رجیم چینج نا بیانیہ ءِ پدپشت داخاطران شاغا انتئے کہ او اسُل الوکہ ہی۔ عمران خان اینو امپورٹڈ حکومت و رجیم چینج انا دروغ انا بیانیہ غان دزکش مسنے۔ اینو پن انا ’’حقی آجوئی ‘‘ نا اصل دروشم پورو وڑاٹ بے نقاب مسنے۔ اوپارے کہ عمران خان اقتدار نا خاطر پاکستان نا خارجہ تعلقداری تے بھلا خطرہ غاتیٹی شاغا۔ عمران خان ہوس اقتدار اٹی ملکی فائدہ غاتون گوازی کرے، چال چلیفے۔ اقتدار نا ہوس اٹی ملک و قوم ءِ گہیو تخا۔ قوم اتون دروغ تڑسا داسہ پاہک کہ امریکی سازش والا ہیت چٹا؟ سپریم کورٹ ءِ اپیل کرسا کرے و داسہ امریکی سازش والا ہیت چٹا؟ عومران خان تینا دروغ اٹ نئے بیرہ قومی سلامتی ءِ خطرہ ٹی شاغا بلکن پاکستان نا خارجہ تعلقداری ءِ ہم بھس کننگ نا کوشست کرے۔ عمران خان تینا سیاسی فائدہ غاتیکن ملکی فائدہ غاتون بھلو گوازی اس کرے۔
