اسلام آباد۔ 14 نومبر (اے پی پی) بنجائی وزیر سمندر پار پاکستانیز و شونداری انسانی وسیلہ ساجد حسین طوری دہ دے ئی سرکاری دورہ غا پیشن نا ملک آ روانہ مس ، او تینا دورہ ٹی سوئٹزرلینڈ، رومانیہ، یونان و پرتگال آ کاہک ہراڑے او تعلقدار کمامدار و پاکستانی کمیونٹی تون اوڑدہی کیک۔ درملکی دورہ نا مسخت چندی ملک آتیٹی پاکستانی تیکن روزگار نا پوسکن ءُ وارخواہی ودی کننگ، تعلقدار ملک آتا کمامدارآتون پاکستانی کمیونٹی نا ویل آتیا ہیت کننگ و ہڑتوم آ کنڈآتا تعلقداری تے مون آ دننگ ءِ۔ بنجائی وزیر ساجد حسین طوری جنیوا ٹی اٹرنیشنل لیبر آرگنائزیشن نا ڈائریکٹر جنرل تون ہم اوڑدہی کیک و اوڑتون پاکستان اٹی ساڑی آ نوکاپ آن زہمی مزور آتا بحالی و امداد نا بابت ہیت وگپ کیک۔ یات سلے کہ وزارت سمندر پار پاکستانیز و انسانی وسیلہ غاتا شونداری آئی ایل او نا کمک اٹ بلوچستان و سندھ اٹی نوکاپ آن زہمی کارندہ غاتا بحالی کن کیش فارورک پروگرام اسے نا بناءِ کرینے ہرادے ملک انا غٹ زہمی علاقہ غاتیٹی تالان کننگک و دابابت ڈی جی آئی ایل او تون ہیت کننگک۔ بنجائی وزیر ساجد حسین طوری روانگی آن مست تینا بیان اٹی پارے کہ رومانیہ ، پرتگال ، اٹلی، یونان و ایلو دیکی ملک آتے بھلو کچ اسے آ افرادی قوت نا گرج ءِ و نن دا ملک آتے پاکستانی ورکرو پروفیشنل گدریفنگ نا معاہدہ کننگ کن پبی کوشست و گپ وتران کننگ اٹی اُن۔ اوپارے کہ او ویزہ غاتا دوئی کننگ و امیگریشن نا عمل ءِ آسان کننگ کن تعلقدار ملک آتا کمامدارآتون ہیت کیک تانکہ کم آن کم وخت اٹی زیات آن زیات پاکستانی لیبرفورس و کسبی بندغ آتے داملک آتیا گدریفنگ مرے۔ اوپارے کہ سمندر پار پاکستانی تا سوب آن پاکستان مالی سال 22 اٹی 31 ارب ڈالر آن زیات نا ریکارڈ ترسیلات زردوئی کرے ہرا ملکی زرگزران نا اسہ بھاز بھلو بشخ اسے ءُ۔ اوپارے کہ اونا اولیت سمندر پار پاکستانی تے زیات آن زیات آسراتی فراوان کننگ و اوفتا ویل آتے دمدستی وڑاٹ ایسر کننگ ءِ و داچرجوئی ٹی او کمیونٹی ویلفیئر اتاشی تے پرمان جاری کرینے کہ سمندر پار پاکستانی تے آسان رسینگ ایتر و اوفتا ویل آتے ایسر کننگ اٹ کوتاہی کپس۔
