جدہ۔ 14 نومبر (اے پی پی) اسلامی کمکار تنظیم(او آئی سی ) نا خصوصی کمیٹی روہنگیا مسلمان تابرخلاف انسانی حق انا خلاف ورزی تا جاچ ءِ ہلکنے۔ سعودی خبررساں ادارہ نا رداٹ جدہ ٹی جمہوریہ گمبیانا وزیر انصاف دائود اجالو نا کماشی ٹی مروک آ اوآئی سی نا دیوان اٹی تنظیم نا سیکرٹری جنرل حسین ابراہیم طحہٰ دیوان آن تران اٹی ہمو گام گیج آتا جاچ ءِ ہلک ہرافتے اوآئی سی روہنگیا مسلمان تا المیہ غان جہانی برادری ءِ معلومدار کننگ کن کرینے۔ اوپارے کہ اوآئی سی انصاف و احتساب نا اصول آتا پابندی نا بابت سنبرینگوک ءِ۔ سیکرٹری جنرل جہانی عدالت انصاف اٹی میانمار نا کمامدارآتا برخلاف مقدمہ ٹی جمہوریہ گیمبیا نا کڑد انا ستاءِ کرسا پارے کہ کمیٹی نا باسک ملک آک و اسلامی کمکار تنظیم نا ادارہ روہنگیا کاز نا مخ تفی ءِ کیرہ و کرسا کیرہ۔ جمہوریہ گیمبیا نا وزیر انصاف و پبلک پراسیکوٹر دائود اجالو روہنگیا نا المیہ غا کاریم کروک آ وزارتی کمیٹی نا سروک نا حیثیت اٹ دیوان اٹی بشخ ہلوک آتے جہانی عدالت انصاف اٹی مقدمہ نا حالیت آتیان معلومدار کرے۔