سی پیک ڈٹ انا رداٹ 1.74ارب ڈالر نا خڑچ انا کروٹ ہائیڈرو پاور پروجیکٹ آن 720 میگاواٹ بجلی دوئی کننگ انگ ءِ، چائنہ تھری گورجز سائوتھ ایشیا انویسٹمنٹ

اسلام آباد۔ 11 نومبر (اے پی پی) چین پاکستان اقتصادی راہداری (سی پیک) ڈٹ انا رداٹ 1.74 ارب ڈالر نا خڑچ انا کروٹ ہائیڈرو پاور پروجیکٹ آن 720 میگاواٹ بجلی دوئی کننگ انگ ءِ، پاکستانی حکومت دا پروجیکٹ ءِ گرین انرجی ٹی بدل کننگ کن سنبرینگوک ءِ۔ چائنہ تھری گورجز سائوتھ ایشیا انویسٹمنٹ لمیٹڈ نا کمامدارآک اے پی پی ءِ پاریر کہ بیلٹ اینڈ روڈ انیشی ایٹو نا رداٹ سی پیک ڈٹ انا رداٹ پاکستان نا کروٹ ہائیڈرو پاور پروجیکٹ نا پوروی آن 5 ملین نا آبادی ءِ کلین اینڈ گرین انرجی نا فراوانی پک مسنے۔ ڈٹ دریائے جہلم (پنجاب/آزاد جموں کشمیر ) نا ہند آ واقع ءِ، داڑان ہندی مخلوق ءِ 5 ہزار نا خڑک روزگار نا وارخواہی دُوبسنے۔ کروٹ ہائیڈرو پاور پروجیکٹ 7 سال انا چنکو مد اسے ٹی 29 جون 2022 آن فعال ءِ ہائیڈرو پاور پروجیکٹ نا تفنگ اٹی چائنا تھری گورجز کارپوریشن تینا کارپوریٹ راجی زمواری ءِ پورو کرے۔ اوپارے کہ پروجیکٹ نا ہندی علاقہ ٹی 20 آن زیات السی آسودہی نا ڈٹ جوڑ کرینے، ہرافتے ٹی اسکول، ہسپتال و سڑک آک اوار ءُ، حیاتیاتی تنوع نا رکھ ءِ کرینے و پروجیکٹ نا تفنگ اٹی ہر سال 4،500 آن زیات ہندی ملازمت براہ راست یا بالواسطہ فراوان کننگانے۔ اوتینا اسکالر شپ پروگرام نا رداٹ 33 طالب علم آتے چینی و پاکستانی یونیورسٹی تیٹی اسیجائی وڑاٹ تینا انڈرگریجویٹ تعلیم پورو کننگ کن سپانسر کرینے۔ پاکستانی حکومت نا نمائندہ، کمیونٹی نا باسک، استاد و پرائمری اسکول نا طالب علم آتا کروٹ ہائیڈرو پاور پروجیکٹ نا دورہ ءِ کرفنگا۔ 720 میگاواٹ نا کل نصب لائخی و 3.2 بلین کلو واٹ گھنٹہ نا سالانہ پیدواری لائخی اتون ، کروٹ ہائیڈرو پاور پروجیکٹ آن 1.4ملین ٹن آب اٹ کولا نا بچت و کاربن ڈائی آکسائیڈ نا پیش تمنگ اٹی ہرسال 3.5 ملین ٹن کمتی مسنے۔ کروٹ ہائیڈرو پاور پروجیکٹ پاک چین سنگتی نا پیدوار درور ءِ۔ چائنا تھری گورجز کارپوریشن توانائی کمکاری نا ہدف آتیا عملدرآمد ءِ برجاتخک، پاکستان نا راجی و اقتصادی شونداری کن پین سوز توانائی فراوان کیک، ہندی مخلوق ءِ پین فائدہ ملک و بنی نوع انسان نا اسیجائی آخبت تون کمیونٹی نا تعمیر اٹی مثبت کڑد ادا کیک۔