اسلام آباد۔ 10 نومبر (اے پی پی) وزیر مملکت خارجہ امور حنا ربانی کھر تون ایرانی صدر نا خصوصی نمائندہ اوغانستان حسن کاظمی غومی اوڑدہی کرے۔ دفترخارجہ نا رداٹ اوڑدہی ٹی وزیر مملکت پرامن و سوگو اوغانستان کن پاکستان نا پکا عزم انا درشانی ءِ کرسا داہیت آ زور شاغا کہ برادرانہ تعلقداری ہڑتوم آملک آتا نیام اٹ یکجہتی نا سوگو رشتہ غاتا بنداو ءِ۔ اواوغانستان ءِ مون تروک چندی پیچیدہ چیلنج آتا ذکر ءِ کرسا اوغان الس نا پدریسہ آسودہی و شونہالی ءِ پک کننگ کن عبوری اوغان حکومت تون جہانی برادری نا آخبتی شمولیت نا اہمیت نا درشانی ءِ کرے۔ وزیر مملکت اوغانستان نا دوست و ہمسایہ مننگ نا ناطہ دا مسخت کن پاکستان وایران نا اہم کڑد انا خاص وڑاٹ ذکر ءِ کرے۔ داکان مست ایرانی نمائندہ خصوصی تینا پاکستانی ہم منصب وزیراعظم نا خصوصی کمکار محمد صادق تون ہم اوڑدہی کرے۔ ہڑتوم آ راہشونک علاقائی امن و شونداری نا تین پہ تینی سوگو ہدف آتے مون آ دننگ کن کمکاری ءِ پین سوگو کننگ آ امنا کریر ۔
