اقوام متحدہ۔ 10 نومبر (اے پی پی) پاکستان پارینے کہ او تینا جوہری پاور پلانٹ و ریسرچ ری ایکٹرنا رکھ ءِ قومی زمواری تکک ہرا جہانی جوہری توانائی ایجنسی (آئی اے ای اے) نا رکھی بست وبند آتا رداٹ ءِ۔ اقوام متحدہ ٹی پاکستان نا نائب آخبتی نمائندہ عامر خان ویاناٹی جوڑ اقوام متحدہ نا جہانی جوہری توانائی ایجنسی (آئی اے ای اے ) نا سالانہ رپورٹ آ 193 باسکی جنرل اسمبلی ٹی تران کرسا پارے کہ پاکستان جوہری مواد، تابکار مادہ غاتون تعلقدار آسراتی و سرجزآتا رکھ اکن گیشتر کانود سازی و ریگولیٹری فریم ورک نا بنداو آ اسہ جامع نیوکلیئر سیفٹی و سیکورٹی نظام اس تیار کرینے۔ اوپارے کہ آئی ااے ای اے نا راہشون دستاویز و جہانی وڑوڈول ءِ مون آ تخسا سیکورٹی رجیم یعنی سیکورٹی نا بشخ اٹی ریاستی گام گیج آتے منظم کننگ کن قاعدہ و اصول آتا نظام ءِ باقاعدگی اٹ جاچ ءِ ہلنگک انتئے کہ ایجنسی نا مینڈیٹ نا رکھ و پک انا پلو اونا اہم تمبہ ءِ۔ اوغٹ ریاست آتیا زور شاغا کہ اوفک تینا تعلقدار رکھی بست وبند آتا زمواری نا پورو تعمیل ءِ کیر۔ اوپارے کہ ایجنسی نا رکھی بست وبند آتے سیاسی مسخت آتیکن بایدے کاریم اٹ اتنگپ۔ اوپارے کہ ایجنسی نا تصدیق نا نظام بیرہ دا حالیت اٹ پت انا قاب مننگ کیک ہراتم اودے بیربری بنداو تیا لاگو کننگے۔ اوپارے کہ سلہہ غاتا چٹفنگ و سلہہ غاتا بے تالانی آ کروک آ متکن آ اتفاق پنانے۔ پاکستانی سفیر عامر خان اقوام متحدہ نا جنرل اسمبلی نا خصوصی دیوان ءِ بٹنگ نا سلاہ تس تانکہ اوڑا اسہ پوسکن ءُ اتفاق رائے اس ودی کننگ مرے ہراٹی ساڑی و مون آ بروک حقیقت آتا بابت گام گیج کننگ مرے و غٹ ریاست آتے اسہ وڑ رکھ فراوان کے۔ اوپارے کہ سلہہ غاتا بے تالانی نا بابت پوسکن آ اتفاق رائے آن امتیازی سلوک و دوہرا معیار ءِ بایدے چٹفنگے و اودے جوان جہانی رکھی بست وبند آتا رداٹ جوہری توانائی نا پرامن کاریم اٹ اتنگ نا مون آ دننگ کن اسہ متفقہ بنداو اس ہم تیار کننگے۔ اوپارے کہ پائیدار شونداری ہدف (ایس ڈی جی) نا دوئی کننگ کن جوہری ٹیکنالوجی نا کاریم اٹ اتنگ پاکستان نا اولیت ءِ۔ اوزور شاغا کہ نن جوہری توانائی ءِ بجلی ودی کننگ نا اسہ پت انا قابل، آخبتی وکاربن آن پاک ذریعہ اسے نا وڑاٹ ہرنہ۔ پاکستان نا جوہری توانائی نا پیدوار ءِ ودفنگ نا کوشست داحقیقت تون کارفرماءِ کہ دا نئے بیرہ توانائی نا کمتی نا گواچی ملک ءِ بلکن موسمیاتی بدلی تا اثرآتیان غٹ آن زیات زہمی مروک آملک آتیٹی اوار ءِ۔ پاکستانی سفیر پارے کہ پاکستان اٹی چاگڑدی بدلی نا سوب آن نوکاپ آن بھلو کچ اسے آ مروک آ بھسکاریک مچ آ دنیا نا ایلو ملک و مخلوق کن خطرہ غاتے ودفینو ۔ اوپارے کہ پاکستان اٹی ساڑی آ نوکاپ گرین ہاؤس گیس انا پیش تمنگ ءِ توننگ کن جہانی کہول آ دمدستی گام گیج آتا گرج ءِ ظاہر کرینے۔ اوپارے کہ نوکاپ نا سوب پاکستان نا اسہ چارک اس دیراٹی ءِ و 3 کروڑ 30 لکھ بندغ زہمی مسنو وخت اس کہ نسخانک پاکستان نا جم ملکی پیدوار (جی ڈی پی) نا دہ می بشخ ءِ۔ پاکستانی سفیر پارے کہ داوڑنا جہانی ویل آتون مون تننگ کن جہانی گام گیج، خڑکی و گیشتر کمکاری نا گرج ءِ۔ پاکستانی سفیر عامر خان پارے کہ حقیقت اٹ جوہری توانائی اسکان رسینگ وخت انا گرجءِ۔
