راولپنڈی۔ 10 نومبر (اے پی پی) اینٹی نارکوٹکس فورس پاکستان منشیات اسمگلنگ اٹی اوار جہانی ٹولی ءِ دزگیر کرے۔ اے این ایف ہیڈکوارٹر راولپنڈی آن جاری بیان نا رداٹ فورس انا مچ آ ملک اٹی منشیات نا برخلاف کارروائی تا چرجوئی برجاءِ۔ فورس سندھ اٹی اہم و بھلو کارروائی اس کرسا جہانی منشیات بہاکروک آتا ٹولی ءِ دزگیرکرسا اوفتیان بھلو کچ اسے ٹی منشیات دوئی کرے۔ ترجمان پارے کہ دزگیر ٹولی ٹی منشیات سپلائی کروک آ، ترغیب تروک آ و کیریئر اوار ءُ، دوبہ دار آتیٹی عبدالجمیل خلیل(سورس آف سپلائی) ہنکینی پشاور، شمیم خان (مین ہنڈلر/سپلائر) ہنکینی کراچی و محمد افہام (کیریئر) ہنکینی کراچی اوار ءُ۔ ترجمان نا پاننگ ءِ کہ دزگیر دوبہ دار آتیان ہیرون آن پُر کیپسول 428، چرس آن پُر کیپسول 259 و چرس 3 کلو 600 گرام دوئی کننگا۔ اوپارے کہ دا ٹولی کم کٹیا والا بندغ آتے لالچ ترسا عرب ملک آتیٹی کیپسول و ایلووڑتے اٹ منشیات اسمگلنگ اٹی اوار ئسر۔ داکان بیدس بلوچستان نا علاقہ کیچ اٹی کارروائی کرسا 400 کلو گرام چرس دوئی کننگا۔ ہندا وڑ اے این ایف و ایف سی نا خیبراٹی اسیجائی کارروائی ٹی پلاسٹک نا تھیلہ غاتیان 20 کلو چرس دوئی کننگا۔ غٹ دوبہ دار آتا برخلاف منشیات تور ایکٹ نا رداٹ مقدمہ درج کرسا جاست وپاست نا بناءِ کننگانے۔