کوئٹہ۔ 10 نومبر (اے پی پی) نوکاپ زہمی تا بحالی کن پاکستان آرمی، ایف سی بلوچستان و سول انتظامیہ نا کمکی کارروائیک برجاءُ۔ سرجم حوال آتا رداٹ نوکاپ زہمی علاقہ غاتیٹی 2 ریلیف کیمپ فعال ءُ ہراڑے 5518 نوکاپ زہمی تے تیار کن و خور، راشن ودرمان فراوان کننگ انگ ءِ۔ تدوک آ24 گھنٹہ ٹی نوکاپ آن زہمی علاقہ غاتیٹی پاکستانی آرمی و ایف سی بلوچستان نا کنڈآن 6801 کن وخور انا پیکٹ حقدار مخلو ق اٹی بشخنگانے۔ نوکاپ آن زہمی ضلع غاتیٹی مخلوق ءِ مرض آتیان بچفنگ کن فری میڈیکل کیمپ آتا چرجوئی ہم برجاءِ۔ تدوک آ 24 گھنٹہ ٹی پاکستان آرمی و ایف سی بلوچستان نا کنڈآن 12 فری میڈیکل کیمپ اڈتننگا ہراٹی 742 ناجوڑآتا درمان ءِ کننگا و مفت دوائی فراوان کننگا، بلوچستان نا غٹ شاہراہ تے ٹریفک نا ہن و بر کن پورو وڑاٹ ملنگانے۔ وخت اس کہ قومی شاہراہ تیا ٹریفک نا روانی ءِ برقرار تخنگ کن نیشنل ہائی وے اتھارٹی، پاک فوج، ایف سی بلوچستان ، پاکستان کوسٹ گارڈ و سول انتظامیہ لگوک ءُ۔
