اسلام آباد۔ 10 نومبر (اے پی پی) نمائندہ خصوصی بین المذاہب ہم آہنگی و دے ٹک نیامی و پاکستان علماکونسل نا چیئرمین حافظ محمد طاہر محمود اشرفی سودی بینکاری نظام نا چٹفنگ کن حکومتی گام گیج آتا ستاءِ کرسا پارینے کہ عالم دین و مشائخ دا چرجوئی ٹی حکومت تون پبی کمک کیرہ، سعودی ولی عہد و وزیراعظم محمد بن سلمان 21 نومبر آ پاکستان آ بریرہ، سعودی حکومت خاص وڑاٹ سعودی ولی عہد محمد بن سلمان نا آئل ریفائنری و پاکستان اٹی زرکاری نا بابت پڑو نا ستاءِ کینہ، پاکستان علما کونسل نا رداٹ اسلام آباد اٹی جہانی کلہو اسلام کانفرنس 16 نومبرآ مریک، ارشد شریف نا کسفنگ نا باندات آ کس اس سیاست کپ، ادارہ غاتیا دوبہ خلنگ سہی اف۔ پنچ شنبےنادے آ پریس کانفرنس اٹی حافظ طاہر محمود اشرفی پارے کہ سود لعنت اسے ہرادے اللہ تعالیٰ و اللہ نا رسول صلی اللہ علیہ و آلہ وسلم تون جنگ گوندنگانے، پاکستان نا الس نا خواست مسنے کہ سودی نظام چٹے، بنجائی شرعی عدالت سودی نظام نا بابت فیصلہ تس ولے سپریم کورٹ اٹی دا فیصلہ نا برخلاف اپیل دائر کننگا، تدوک آ نن پی ڈی ایم اٹی ساڑی جماعت آتا غٹ راہشون تا سلابت اٹ وزیراعظم شہباز شریف دااپیل ءِ پدی ہلنگ نا پارت کرے، وزیرخزانہ اسحاق ڈار تدوک آ نن قوم ءِ دا مستائیءِ تس کہ سودی نظام نا چٹفنگ کن حکومت پبی و سنجیدہ وڑاٹ تینا کاریم ءِ کننگ ءِ و دا بابت دائر اپیل آتے پدی ہلنگ انگ ءِ، داڑا اللہ نا شکر ءِ ادا کینہ۔
