اسلام آباد، 10 نومبر (اے پی پی): چینی پیپلز ایسوسی ایشن فار فرینڈ شپ ود فارن کنٹریز (سی پی اے ایف ایف سی) ءِ صدر لن سونگ ٹیان ءَ گوشت کہ چین انفراسٹرکچر ءِ دیمروئی، صنعت کاری ءُ ورنا آنی ازمکاری آنی تہ ءَ گیشی ءِ وسیلگ ءَ پاکستان ءِ کمک ءَ کنت۔ اے ھیالانی درشانی آئی ءَ پنچ شمبے ءِ روچ ءَ اسلام آباد ءَ چینی سفاتخانہ ءَ پریس کانفرنس ءَ گوں گشتانک دیان ءَ کت۔ (سی پی اے ایف ایف سی) ءِ صدر Lin Songtian ءَ چین پاکستان بے دروریں دوستی آنی سر ءَ چمشانک دیان ءَ گوشت کہ اے چین ءِ زمہ واری انت کہ آ تجارت ءَ را ودینان ءَ بنیاتی کوکا ءُ ٹیکنالوجی ءِ دیمروئیءَ جدید جوڑ کنان ءَ پاکستان ءَ را چہ گریبی ءَ چہ در بکن انت۔ آئی ءَ گیش تران کنان ءَ گوشت کہ اے سیم سر آنی در جنگ ءِ واستہ وانگ ءُ زانگ ءَ ابید تکنیکی ازمکاری بنیاتی انت۔ اے رد ءَ چین پاکستان ءَ گوما کزبی ھیل کاری آنی ادارگ ءُ دوئیں ملک آنی کمک آنی وسیلگ ءَ ورنا آنی بلدکاری ءَ را گہتر جوڑ کنگ ءِ واستہ کار کنگ ءَ انت۔ آئی ءَ گوشت کہ (سی پی اے ایف ایف سی) یک ءِ دومیگ ءَ را پھمگ ءُ دوئیں ملک آنی نیام ءَ یکوئی آناں مھکم جوڑ کنگ ءِ وستہ مردم آنی نیام ءَ روگ ءُ آیگ آناں گیش کنت۔ سرپدی پیداک کنگ ءِ واستہ میڈیا ءِ کرد ارزشتی انت ءُ میڈیا ءِ سر ءَ زور پر دات کہ آ دوئیں ملک آنی دیمروئی ءُ گامگیج آناں پیش دارگ ءَ وتی کرد ءَ را پیلو بکن انت۔ یک جستے ءِ پسو ءَ دیان ءَ ، آئی ءَ گوشت کہ بیلٹ ایںڈ روڈ انیشیٹو (بی آر آئی ) یکجائی آیوکیں بانداست ءِ میاں اوستمانی براتی ءِ جوڑیشت ءِ واستہ یک ٹوھیں پلیٹ فارم ات ءُ اے بنی آدمی دیمروئی ءِ درگت ءَ یک ارزشتی ایں گامگیج ات۔ آئی ءَ گوشت کہ سی پیک ءِ اولی بھر ءَ پاکستان ءَ ھاٹیگ ءِ ڈکال ءَ کمک اتکگ ءُ رسانکی کوکا ءِ تہءَ گہتری اتکگ۔ دوئیں ملک یکجا ءَ اے روایتی دوستی ءِ ترجمہ کنگ ءِ واستہ کار کنگ ءَ انت تانکہ مئے مردم آنی واستہ گیش شاھیگان ءُ ٹوھیں سیت بہ بیت۔ چینی کمیونسٹ پارٹی (سی سی پی) ءِ 20 بیستمی کانگریس ءِ بابت ءَ تران کنان ءَ آئی ءَ گوشت کہ کانگریس ءِ کامیاتیں گڈ ءَ چین ءَ اولی سروک پاکستان ءَ اتکگ۔ وتی تر ءُ تاب ءِ ھوالگ ءَ یک جستے ءِ پسو ءَ آئی ءَ پاکتان ءَ گوشت کہ وھد ءِ من ادا اتکاں گڈا منی باز جوانی ءَ گوں وش اتک کنگ بوت۔ چینی الس پاکستان برات / گہار آں چہ سک باز شات ءُ گل انت۔ چوشکہ مئے کرا بازیں میاں اوستمانی ءُ ملکی مٹ ءُ بدلی جاور است انت، بلے مئے ملک، حکومت ءُ الس مدام یکے دومیگ ءِ گوما ھمگام ءَ اوشتاتگ انت۔ آصدر (سی پی اے ایف ایف سی) ءَ اے گپ ءِ سر ءَ زور پر دات کہ “ما 2008 ءِ سردی ءِ موم ءَ بوھوکیں زمین چنڈ ءَ چہ پد چین ءِ واستہ پاکستان ءِ کمک ءَ را اچبر بے ھیال کت نہ کناں۔
