مسلم امہ ءِ مون تروک ویل آتا ایسری علامہ محمد اقبال نا فکر آتیٹی تخوک ءِ، اسپیکر قومی اسمبلی راجہ پرویز اشرف و ڈپٹی اسپیکر زاہد اکرم درانی

اسلام آباد۔ 09 نومبر (اے پی پی) اسپیکر قومی اسمبلی راجہ پرویز اشرف و ڈپٹی اسپیکرزاہد اکرم درانی ئسک پارینو کہ مسلم امہ ءِ مون تروک ویل آتا ایسری علامہ محمد اقبال نا فکر آتیٹی تخوک ءِ۔ قومی اسمبلی سیکرٹریٹ ڈائریکٹوریٹ جنرل آف میڈیا نا کنڈآن جاری بیان نا رداٹ اسپیکر قومی اسمبلی راجہ پرویز اشرف وڈپٹی اسپیکر زاہد اکرم درانی ئسک یوم اقبال نا وخت آ تینا خصوصی کلہواٹی مفکر پاکستان علامہ محمد اقبال ءِ خراج تحسین پیش کرسا پاریر کہ مسلم امہ ءِ مون تروک ویل آتا ایسری علامہ محمد اقبال نا فکر آتیٹی تخوک ءِ، علامہ اقبال نا فکر و نظریہ غاتیا عمل کرسا مسلم امہ ءِ مون تروک چیلنج آتا مون ءِ توننگ مریک۔ اسپیکر قومی اسمبلی پارے کہ علامہ اقبال تینا ولولہ انگیز شاعری نا کمک اٹ مسلم امہ ءِ غفلت نا تغ آن بیدار کرے۔ راجہ پرویز اشرف پارے کہ قائد اعظم محمد علی جناح نا متحرک کماشی ٹی برصغیر نا مسلمانک علامہ اقبال نا جتا ءُ وطن اسے نا تغ ءِ پورو کریر۔ شاعر مشرق علامہ اقبال نا برصغیر نا مسلمان تیکن جتا ءُ وطن اسے نا تغ نعمت اسے آن کم اَلوکہ۔ اسپیکر قومی اسمبلی پارے کہ علامہ اقبال اتحاد بین المسلمین نا داعی ئسک۔ علامہ اقبال مسلمان تے تینا وسیلہ دُو انا زور آ سیبو کننگ نا درس تس۔ راجہ پرویز اشرف پارے کہ علامہ اقبال نا فکر و اسلامی رغاموک آتیا عمل کرسا ساڑی آ دور انا ویل آتا مون ءِ توننگ مریک۔