چاگڑدی بدلی تا مون ءِ توننگ کن 2030 اسکان پدتموک و ایمرجنگ ملک آتے توانائی نا بنداوی پنجر نا شونداری کن اسیجائی زرکاری نا گرج ءِ، آئی ایم ایف

اسلام آباد۔ 09 نومبر (اے پی پی) چاگڑدی بدلی تا مون ءِ توننگ ن 2030 اسکان پدتموک و ایمرجنگ ملک آتے توانائی نا بنداوی پنجر نا شونداری آ کم از کم اسہ کھرب ڈالر نا اسیجائی زرکاری نا گرج ءِ۔ جہانی مالیاتی فنڈ (آئی ایم ایف) تینا اسہ رپورٹ اسے ٹی پارینے کہ پدتموک و ایمرجنگ زرگزران تیٹی گرین ہاؤس گیس آتا اخراج اٹی کمتی و چاگڑدی بدلی تا نسخان تے کم آن کم کننگ کن چاگڑدنا بشخ اٹی نجی زرکاری اہم ءُ کڑد اس ادا کننگ کیک۔ دا بابت 2030 اسکان دا ملک آتیٹی توانائی نا بنداوی پنجر نا شونداری آ کم از کم اسہ کھرب ڈالر نا اسیجائی زرکاری المی ءِ وخت اس کہ 2050 اسکان ایلو چندی بشخ آتیٹی 3 آن 6 کھرب ڈالر نا زرکاری نا گرج ءِ۔ آئی ایم ایف پارینے کہ داکان بیدس 2030 اسکان سطح سمندر اٹی ودکی و ودوک آ خشک سالی نا سوب آن چاگڑد نا بشخ انا نسخان تا مون ءِ توننگ کن سالانہ 140 آن 300 ارب ڈالر نا ودکی زرکاری ہم درکار مریک۔ رپورٹ نا رداٹ پدتموک و ایمرجنگ اکانومی تیٹی چاگڑدی بدلی تا ودوک آ نسخان تا توننگ کن 2050 اسکان 520 ارب آن 1.75 کھرب ڈالر نا اسیجائی زرکاری وخت انا اہم ءُ گرج اسے۔