کرہ ارض ءِ چاگڑدی بدلی تا منفی اثر آتیان رکھ کننگ کن خڑکی کمکاری ءِ مون آ دروئی مریک، وزیراعظم شہباز شریف نا مڈل ایسٹ گرین انیشی ایٹو سمٹ آن تران

شرم الشیخ۔ 08 نومبر (اے پی پی) وزیراعظم محمد شہباز شریف چاگڑدی بدلی نا اثرآتے کم کننگ کن دمدستی گام گیج کننگ نا گرج ءِ تالان کرسا پارینے کہ پاکستان خشک علاقہ غاتیٹی جنگل آتا بحالی کن تکنیکی مہارت نا فراوانی نا کمک اٹ ’’مڈل ایسٹ گرین انیشی ایٹو‘‘ نا مسخت آتا دوئی کننگ کن سنبرینگوک ءِ، کرہ ارض ءِ چاگڑدی بدلی تا منفی اثر آتیان رکھ کننگ کن خڑکی کمکاری ءِ مون آ دروئی مریک۔ داخیال آتا درشانی ءِ او مڈل ایسٹ گرین انیشی ایٹو سمٹ 2022 آن تران کرسا کرے۔ وزیراعظم پارے کہ پاکستان پائیدار آخبت نا اسیجائی وژن، گچین کمکاری، علاقائی ، جہانی رابطہ و سائنس آ تالان فیصلہ سازی نا راہشون اصول آتا پورو مخ تفی ءِ کیک ، ایم جی آئی موسمیاتی بدلی نا توننگ کن سہی کنڈ اسہ بھلو گام اسے، پاکستان دا گام انا گیشتر مسخت آتیکن پورو وڑاٹ سنبرینگوک ءِ و باسک ملک آتون کرہ ارض ءِ موسمیاتی بدلی نا اثرآتیان رکھ کننگ کن درکار ہر گام اٹی خڑکی کمکاری نا چاری ءِ۔ وزیراعظم پارے کہ دااہم سروک دیوان نا اڈتننگ کن محمد بن سلمان و مصر انا صدر عبدالفتاح السیسی نا منت واری ءِ ہرفنہ، نن مڈل ایسٹ گرین انیشی ایٹو(ایم جی آئی ) نا بناءِ کننگ آ ولی عہد شہزادہ محمد بن سلمان نا دا اہم وژن ءِ قدر انا نظر اٹ ہرنہ ہر ادے ٹک نیامی ٹی تینا وڑنا اولیکو چاگڑدی نظام نا بحالی نا گام ءِ۔ اوپارے کہ کنونشن و پیرس معاہدہ نا رداٹ فطرت آ تالان ایسر ننا ملک انا موسمیاتی بدلی تا منفی اثرآتیان بچفنگ نا ایجنڈا نا بنداو ءِ، ہندا وڑ فطرت آ مبنی گام گیج کون آ شجرکاری ، ملک آتے موافقت نا لائخی نا تعمیر اٹی کمک کیک، گرین ہاؤس گیس آتا پیش تمنگ ءِ تورک و قومی  و علاقائی کہول آ موسمیاتی بدلی تا سوب آن مروک آ نسخان تے توننگ و اوفتا شدت اٹی کمتی اتنگ اٹ کمک کیک، داہم ننا ایجنڈا نا وت ءِ۔ وزیراعظم پارے کہ پاکستان ومڈل ایسٹ گرین انیشی ایٹو اٹی اوار کیہی ایلو باسک ملک آتے چاگڑدی بدلی تا اثرآتا سوب آن ترند رفتار چاگڑدی بے بریبری  مون تروک ءِ ہرانا نتیجہ ٹی ننے ترند پِر، بھسکار نوکاپ، باسنی نا شدت، جنگل آتیٹی لگوک آ پدریسہ خاخر، گلیشیئر نا دیر مننگ آن نوکاپ و داوڑنا بھاز انگا موسمیاتی بھسکاری تون مون تروئی تمک۔ وزیراعظم پارے کہ زیات تر باندات آتیٹی داڑان قدرتی وسیلہ غاتا پدریسہ انحطاط تون مون تروئی تمک ہرانا سوب آن آبادی نا اسہ بھلو بشخ اس ذریعہ معاش آن محروم مریک۔ وزیراعظم شہباز شریف پارے کہ پاکستان پائیدار آخبت نا اسیجائی وژن، گچین کمکاری، علاقائی و جہانی رابطہ، اختراع آ تالان گام گیج و سائنس آ تالان فیصلہ سازی نا راہشون اصول آتا پورو مخ تفی ءِ کیک ہر ادا گام ءِ باسک ملک و اوفتا آبادی ءِ زند ءِ بدل کروک سرسہبی ٹی اسہ مرغن ءُ سفر اس طے کیک۔ اوپارے کہ ایم جی آئی نا مسخت پاکستان نا قومی جنگلات پالیسی و گرین پاکستان پروگرام نا مسخت آتون ہم گرنچ ءِ ہرا 2030ء اسکان ننا جنگل، جنگی حیات و چاگڑدی نظام نا رکھ، اوفتے ودفنگ و پائیدار بست وبند آ مرکوز ءِ۔ وزیراعظم پارے کہ گرین پاکستان پروگرام 2016ء ٹی بناکننگا ہرا شجرکاری نا ننا قومی پروگرام ءِ ہرا 2023ء اسکان 3 ارب 30 کروڑ درخت خلنگ و 2030ء اسکان مسہ ہنداخہ ودکی نا ہدف آتون برجاءِ، داڑان ہندی آبادی کن روزگار نا ہزار آ وارخواہی ودی مریک۔ وزیراعظم پارے کہ ای داڑے پاکستان نا پروٹیکٹڈ ایریاز انیشی ایٹو نا ہم ذکر ءِ کننگ خواوہ، ہراننا خطرہ غاتیان دوچار نباتات و حیوانیات نا رکھ اکن 36 لکھ ، ہیکڑ رکھ علاقہ غاتیٹی ودکی کرینے۔ وزیراعظم پارے کہ او داوخت آ گرین انیشی ایٹو ءِ چلیفنگ کن سعودی عرب ناستاءِ کیک، پاکستان مہالو آن علم انا ہل و تس و چاہندار آتا فراوانی نا کمک اٹ کمکاری ءِ ودفینے، دابیرہ بناءِ، پاکستان ایم جی آئی نا غٹ باسک ملک آتے بارُن انگا علاقہ غاتیٹی جنگل آتا بحالی ، مین گرووز، رکھ علاقہ غاتا بست وبند، کاربن سٹاک نا تشخیص و جنگل آتا اروکی نا نظام نا جوڑ کننگ نا بابت آزموندہ و تکنیکی مہارت نا ہل و تس اٹی کمک فراوان کننگ آ آمادگی نا درشانی ءِ کیک۔ اوپارے کہ کرہ ارض عمل کن توار کننگ ءِ ولے ہندن لگک کہ نن مشکل وڑاٹ ہیل کننگ نا تہیہ کرینن ، ایم جی آئی وڑانا گام گیج سہی سمت نا کنڈآ  اسہ بھلو گام اسے، پاکستان دا گام انا گیشتر مسخت آتا دوئی کننگ کن پورو وڑاٹ سنبرینگوک ءِ و باسک ملک آتون بیرہ دا گام انا حد اسکان آخا بلکن موسمیاتی بدلی نا اثرآتیان کرہ ارض ءِ رکھ کننگ کن ہر گام آ خڑکی کمکاری اتون کاریم نا چاری ءِ ۔