شرم الشیخ۔ 07 نومبر (اے پی پی) وزیراعظم شہباز شریف پارینے کہ موسمیاتی بدلی نا منفی اثرآتیان بچنگ و خطرہ غاتے کم کننگ کن پیشگی خبڑدار کننگ نا نظام بھاز اہم ءِ، موسمیاتی بدلی پاکستان کن غٹ آن بھلا چیلنج ءِ، نوکاپ نا بھسکاریک ہنداخہ زیات ءُ کہ زہمی تا گرج آتے پورو کننگ دُوآن پیشن ءِ، آخبت خڑک اٹی موسمیاتی تنکی پین سنگین مننگ نا گڑتی ءِ۔ اوداخیال آتا درشانی ءِ داڑے بڑزکو کہولی گول میز ’’ارلی وارننگ فار آل ایگزیکٹیو پلانز لانچ ‘‘ دود آن تران کرسا کرے۔ وزیراعظم محمد شہباز شریف پارے کہ ارلی وارننگ سسٹم (ای ڈبلیو ایس) پسماندہ و موسمیاتی شدت آن زہمی ملک آتیکن موافقت و لچک نا ڈٹ بندی کن المی جوڑ مسنے، دا نظام پسماندہ علاقہ غاتیٹی رہینگوک آ بندغ آتیکن اسہ اہم ءُ مواصلاتی نظام اسے نا وڑاٹ کاریم کیک تانکہ اوفتے قدرتی آفت آتیان پیشگی خبڑدار کننگ مرے، دا نظام چاروکی و پیشگوئی نا درستگی ، آفت آتا خطرہ غاتیٹی کمتی و انتظام تون مون تننگ کن حساب وکتاب نا کمک اٹ ترند رفتار و جوان ردعمل نا ڈٹ بندی کن جوان ءُ وخت اس ایتک، پوسکن آ ٹیکنالوجی نا کاریم اٹ اتنگ و ارلی وارننگ چین آفت آتا خطرہ غاتا بابت علم، خطرہ نا ڈس و نشان ءِ خلنگ ، اوڑان بچنگ و زوت عمل نا تیاری نا چار عنصر آتے گچی کننگ اٹ کمکار مریک۔وزیراعظم ارلی وارننگ نظام نا پاکستان اٹی سرسہبی نا بابت پارے کہ دانظام نا سوب آن داسال ملک اٹی باسنی نا مریس ریسہ نا سوب آن ششپرگلیشیئر اٹی شگاف مننگ آن ہزار آ جونک بچار، دا گلیشیئر نا کیرغ اسہ غیر مستحکم جھیل اسے آن ہر سال وادی ہنزہ ٹی نوکاپ بریک ولے ارلی وارننگ سسٹم آن مخلوق ءِ پیش تمنگ نا وخت ملک۔ موسمیاتی بدلی 2022ء نا اثرآتا بابت اوپارے کہ قراقرم ہائی وے آ حسن آباد خلق اٹی 6 ہند، کشاری ڈغار ، 2ہائیڈرو پاور پروجیکٹ و باغک بھس مسر ولے ہچءُ جانی نسخان اس متو ، داڑے ارلی وارننگ سسٹم دا گلیشیئر نا براہ راست چاروکی ءِ کیک و ہر دے جھیل اٹی دیر انا بننگ و پیش تمنگ نا کساس ءِ خلیک، دانظام نا چاروکی ءِ بنجائی و صوبائی ڈیزاسٹر مینجمٹ اتھارٹی کیرہ ، داسسٹم ہموڑے زیات سرسہب مس ہراڑے کمیونٹی تیکن تربیت و آگاہی نا سیشن و مشق آتا وار وار بست وبند ءِ کننگا، خورکار موسمی نظام و کمیونٹی نا شمولیت نا سوب آن گلیشیئر نا چاروکی پاکستان کن اسہ سرسہبی اسے نا کسہ جوڑ ءِ، دانظام ءِ ایلو علاقہ و وادی تیٹی ہم خلنگک، دا پروجیکٹ وزارت و یواین ڈی پی نا اسیجائی ڈٹ ءِ، دا پاکستان اٹی گرین کلائیمیٹ فنڈ انا اولیکو ڈٹ ءِ، دا ڈٹ انا رداٹ 16 گللگت بلتستان و 8 کے پی ٹی خودکار موسمی نظام خلنگانے، دانظام نا رداٹ آبپاشی نا کسر و ڈھلوان اٹی سوگوی کن شجرکاری ہم اوار ءِ۔ وزیراعظم پارے کہ ارلی وارننگ سسٹم آفت نا خطرہ غاتیٹی کمتی نا اسہ اہم ءُ جزو اسے ہرا جانی نسخان ءِ توننگ تون اوار اوار قدرتی خطرہ غاتا زرگزرانی اثرآتے کم کیک۔ وزیراعظم پارے کہ سینڈائی فریم ورک ڈیزاسٹر رسک ریڈکشن 2015-30ء پوسکن آ نوکاپ ءِ توننگ و ساڑی آ فت نا خطرہ غاتے کم کننگ کن بھسکاری نا خطرہ ءِ سمجھنگ ، آفت آتا خطرہ غاتون مون تننگ کن ڈیزاسٹر رسک گورننس ءِ سوگو کننگ، بھسکاری ٹی کمتی کن زرکاری کننگ و گچین ردعمل کن تیاری و بحالی و پوسکن تفنگ نا چار ٹک آتیا تالان ءِ۔ وزیراعظم پارے کہ ارلی وارننگ سسٹم نوکاپ و وموسمی واقعہ غاتیٹی دیر و سفائی نا نظام تون اوار اوار جان جوڑی نا نظام ءِ گچین کننگ و دانا بابت خطرہ غاتے کم کننگ اٹ کمکار مننگ کیک، ارلی وارننگ سسٹم موبائل کمیونیکیشن نیٹ ورک اتون براہ راست گنڈوک ءِ ہرا دمدستی ردعمل نا فریم ورک ، ڈٹ و گام گیج آتے متحرک کننگ اٹ موثر ءِ۔ وزیراعظم پارے کہ موسمیاتی بدلی پاکستان کن غٹ آن بھلا چیلنج ءِ، پاکستان نا گڑاس سویلی شار تیٹی داسال 53 سینٹی گریڈ آن گدرینگا، نن کرہ ارض انا باسن آ ہند آتا میزبان جوڑ مسن ہرا جنگل اٹی خاخر نا سوب مریرہ، داڑان فصل آتا پیدوار زہمی مریک۔ وزیراعظم پارے کہ دا نوکاپ آن مروک آ نسخان تا کساس 30 ارب ڈالر خلنگانے، ہرا ننے 10 سال پدی درینے، بنداوی پنجر، اسکول، ہسپتال آتون اوار ہر گڑا ءِ دُوارہ تفنگ نا گرج ءِ۔ وزیراعظم پارے کہ نوکاپ آن زہمی بندغ آتا دمدستی نغد امداد کن حکومت پاکستان تینا وسیلہ غاتیان 66 ارب 70 کروڑ روپئی آن زیات نا ادائیگی کرینے، دا ادائیگی تے بی آئی ایس پی نا کمک اٹ 26 لکھ آن زیات مخلوق ءِ کننگانے۔ وزیراعظم پارے کہ وزارت موسمیاتی بدلی نوکاپ آن زہمی آبادی کن موسمیاتی لچک نا ڈٹ آتیکن جتا 15 کروڑ ڈالر نا دُوارہ کاریم اٹ ایس، وخت اس کہ پاکستان ہائیڈرو میٹ وکلائیمیٹ سروسز پروجیکٹ نا 4 کروڑ 80 لکھ ڈالر نا فنڈ ہمو مسخت کن کاریم اٹ اتنگا ہرا ایم ای ٹی آفس نا تکنیکی لائخی ءِ گچین کننگ و اپ گریڈ کننگ کن ئسک۔ وزیراعظم پارے کہ پاکستان اٹی ارلی وارننگ سسٹم نیشنل ڈیزاسٹر رسک انا ڈٹ بندی نا اسہ المی ءُ بشخ اسے۔ وزیراعظم شہباز شریف پارے کہ نیشنل ڈیزاسٹرمینجمنٹ پلان 2012 نا رداٹ ملٹی ہیزیڈ ارلی وارننگ سسٹم (ایم ایچ ای ڈبلیو ایس) پاکستان اٹ آفت آتا خطرہ غاتا مینجمنٹ نا ڈٹ بندی و ایکشن نا المی جزو ءِ ہراٹی چار جتا حکمت عملی اختیار کننگانے اوفتے ٹی اولیکو حکمت عملی موسم نا پیشگوئی و ارلی وارننگ سسٹم نا سوگوی، ارٹ میکو حکمت عملی مخصوص علاقہ غاتیٹی ہندی کہول آ ہیزیڈ میپ تیار کننگ، مسٹ میکو حکمت عملی وخت آن مست وارننگ نا نظام ءِ سوگو کننگ و چارمیکو حکومت عملی بنائی وارننگ و انخلا نا نظام نا لائخی نا تیاری ءِ۔ وزیراعظم پارے کہ 2010 آن پد پاکستان نا ارلی وارننگ سسٹم اٹی بھلو گچینی اس بسنے، پاکستان نا محکمہ موسمیات تون اوار اوار صوبائی محکمہ غاتا کنڈآن جاری کروک آ بنائی پیشنگوئی و انتباہ جان تے بچفنگ کن گچین پک مس ۔ وزیراعظم پارے کہ پاکستان ءِ داسال اخہ در پِر تتون مون تروئی تماداخہ در بھسکاری زنداٹی اسُل خنتنون، 30 ساال مہالو آن دا پِرک اوسطا 190 درسد زیات وخت اس کہ سندھ اٹی سالانہ اوسط آن 6 آن 7 گنا زیات پِر مس۔ وزیراعظم پارے کہ سسٹمیٹک آبزرویشن فنانسنگ فسیبلٹی (ایس او ایف ایف ) ءِ نومبر 2021 آ جوڑ کننگا، ہرانا مسخت پدتموک ریاست و کم شون ہلوک ملک آتا موسم و موسمیاتی مشاہدہ غاتیٹی مروک آ خلا ءِ پُر کننگ ءِ دا ڈٹ شریدار ملک آتے موسم و آب و ہوا نا حساب و کتاب ، پیشنگوئی و ردعمل آ چکار نا کمک اٹ گچین، لچکدار شونداری، موسمیاتی بدلی و بنائی انتباہ نا نتیجہ غاتیٹی کمک کیک۔ ڈبلیو ایم او کامن الرٹنگ پروٹوکول (سی اے پی ) ءِ تینا کننگ نا ہم وکالت کننگ ءِ ہراکہ غٹ مواصلاتی چینل نا کمک اٹ غٹ خطرہ غاتا انتباہ ٹی اسہ جہانی ءُ آ ب اسے، دانا کمک اٹ آخبتی الرٹ کلہو ءِ اوار چندی مواصلاتی کسر تیا تالان کننگ مریک، جہانی ٹیلی کمیونیکشین یونین نا شریداری اٹ اودے جوڑ کننگانے، ڈبلیو ایم او چندی ملک آتیٹی اونا نفاذ اٹی فعال کڑد ادا کننگ ءِ۔ وزیراعظم پارے کہ ہروڑنا خطرہ نا ہلہلہ ئی انتباہ نا تبادلہ کن کوپ اسہ عمومی پروٹوکول اسے نا وڑٹ کاریم کننگ کیک ولے دانا گچین مننگ کن داٹی کثیر الفریقین و خطرہ ٹی تموک آ کمیونٹی تا فعال شمولیت نا گرج مریک۔ وزیراعظم پارے کہ معلومداری تا تبادلہ کن عام فہم و سادہ نظما انتباہ نا فائدہ غاتے ودفنگ کیک ہندا وڑ دامسخت ءِ دوئی کننگ کن جہانی کہول انا ملٹی ہیزیڈ ارلی وارننگ سسٹم مننگ المی ءِ، ڈبلیو ایم او 2021 ٹی اسہ فاسٹ ٹریک انیشیٹیو اسے نا بناءِ کرے ہرانا مسخت ہمو غٹ ڈیہہ تیٹی کوپ ءِ رکھ و اوڑا عملدرآمد ءِ۔داڑآ داوخت آ افریقی علاقہ غاتیٹی عملدرآمد مننگ ءِ وخت اس کہ ڈبلیو ایم او ایلو شریدار آتا خواہندار ءِ۔ وزیراعظم پارے کہ اقوام متحدہ نا شونداری پروگرام (یواین ڈی پی ) نا کلائیمیٹ انفارمیشن و ارلی وارننگ نا نظام افریقہ و پیسفک اٹی داوخت آ فعال ءِ ہرا قدرتی آفت آتا ردعمل و گچین تیاری تیٹی کمکار ءِ۔
