موسمیاتی بدلی نا منفی اثر و نوکاپ نا بھسکاری تتون مون تننگ کن جہانی برادری پاکستان نا پبی کمک ءِ کے، یواین سیکرٹری جنرل انتونیوگوتریس و وزیراعظم محمد شہباز شریف نا اسیجائی پریس کانفرنس

شرم الشیخ۔ 07 نومبر(اے پی پی) اقوام متحدہ سیکرٹری جنرل انتونیوگوتریس پارینے کہ موسمیاتی بدلی نا منفی اثر و نوکاپ نا بھسکاری تتون مون تننگ کن جہانی برادری نا زمواری ءِ کہ او پاکستان نا پبی کمک ءِ کے، پاکستان ءِ نوکاپ آن بھلو کچ اسے آ نسخان مسنے، جہانی مالیاتی ادارہ پاکستان ءِ وام تیٹی چھوٹ ایتروخت اس کہ وزیراعظم محمد شہباز شریف پارے کہ موسمیاتی بدلی نا سوب ہرابھسکاری پاکستان اٹی مس او پاکستان اسکان محدود سلپک، نوکاپ آن ننا راجی و اقتصادی نظام ءِ بھاز نسخان رسینگانے، دنیا نا کنڈآن بھسکاری و نسخان تا ازالہ اسٹ انگا اومیت ءِ۔ داخیال آتا درشانی ءِ اوپاکستان پویلین اٹی یواین کلائیمیٹ چینج کانفرنس کوپ۔ 27 اسیجائی پریس کانفرنس آن تران کرسا کریر۔ داوخت آ تران کرسا اقوام متحدہ نا سیکرٹری جنرل انتونیوگوتریس پارے کہ او نوکاپ آن پد پاکستان نا دورہ ءِ کرے۔ نوکاپ آن پاکستان اٹی فصل، مخلوق نا روزگار و زند انا نظام ءِ بھاز نسخان رسینگا و مخلوق نا غٹ گڑاک بھس مسر، ای مخلوق ءِ اسہ ایلو نا کمک ءِ کرسا خناٹ، پاکستان نا الس نا حوصلہ، ہمت و فراخدلی ستاکڑزک، پاکستان نا الس نا فراخدلی نا کنے مہالو آن سماءِ، پاکستانی الس نا کنڈآن لکھ آ اوغان باہوٹ آتا مہمانداری ناقابل فراموش ءِ۔ اوپارے کہ پاکستان اٹی نوکاپ آن بھاز نسخان مسنے، پاکستان جہانی برادری نا پبی کمک نا حقدار ءِ، و موسمیاتی بدلی تیان غٹ آن زیات زہمی مروک آ ملک آتیٹی اوار ءِ، مشکل نا داساہت اٹی پاکستان ءِ کمک نا گرج ءِ، جہانی برادری نا زمواری ءِ کہ او پاکستان نا داحالیت آتیٹی بحالی و پوسکن تفنگ نا عمل کن بھلو کچ اسے آ پبی کمک کے، دا بابت بھاز گڑا کننگ نا گرج ءِ، بھسکاری و نسخان نا پوروی نا بابت کوپ۔ 27 ءِپیدوار روڈ میپ اس بایدے جوڑ کننگے، داڑان پاکستان ءِ ہم فائدہ مریک ۔ اوپارے کہ پاکستان اٹی نوکاپ آن بھلو کچ اسے آ نسخان مسنے، پاکستان ءِ مشکل آن کشنگ کن غٹ تینا کڑد ءِ ادا کیر، موسمیاتی بدلی نا اثرآتیان زہمی پاکستان ءِ وام تیٹی اِلنگ ناہم گرج ءِ و دا چرجوئی ٹی پاکستان کون آ زہمی ملک آتے وام تا پدی تننگ نا بابت بحالی و پوسکن تفنگ نا دروشم اٹ زرکاری نا گرج ءِ، جہانی مالیاتی ادارہ غاتے مرے کہ او پاکستان ءِ وام تیٹی اِلر، پاکستان تون اوار قدرتی آفت آتیان ودی مروک آ حالیت آتیان زہمی ملک آتے رعایتی فنانسنگ مرے، اومیت ءِ کہ جی۔ 20 ملک آک دابابت گام گیج کیرہ۔ اوپارے کہ پاکستان جہانی برادری نا کنڈآن پبی امداد نا حقدار ءِ۔ اوپارے کہ پاکستان نا الس و حکومت تون ساڑی حالیت آتیٹی پورو یکجہتی نا درشانی ءِ بایدے کننگے۔ وزیراعظم پارے کہ پاکستان تون یکجہتی نا درشانی ءِ کننگ کن پاکستان پویلین بننگ آ سیکرٹری جنرل انتونیوگوتریس نا منت وار اُٹ، اقوام متحدہ نا سیکرٹری جنرل تینا دورہ پاکستان اٹی پاکستان اٹی نوکاپ آن مروک آ بدترین بھسکاری ءِ تینا خن تے اٹ خنا، نا دورہ و ہمدردی نا جوزہ غاتے مدام یات تخنگک۔داننکن بھاز اہمیت تخک۔ وزیراعظم پارے کہ نی جوان چاسہ کہ جہانی برادری نا وڑاٹ نن اسہ پوسکن ءُ گرین ڈیل اسے نا درگہ غا سلوک اُن ہراکان پدی ہِننگ ناممکن مریک، نی چاسہ کہ پاکستان کون آ گڑاس ملک زیات زہمی مریرہ۔ اوپارے کہ دنیا نا نسخان و بھسکاری نا ازالہ کن داوڑنا کانفرنس آک اسٹ انگا اومیت آک ءُ۔ اوپارے کہ پاکستان اٹی لکھ آ بندغ آتے یخ انا موسم پناہ و معاش آن بیدس تیر کروئی مریک، حالانکہ دااوفتا بنداوی حق ءِ ، زالبول و چناک داسہ ہم تینا بنداوی گرج آتا رکھ اکن ننا کنڈآ ہُننگ ءُ وخت اس کہ خلق آک گچین آخبت نا رکھ انا چاری ءُ و داوڑنا بحالی کن وسیلہ غاتا گرج ءِ ہرافتا نن ضمانت تننگ آن قاصر اُن، ملک انا سویلی علاقہ غاتیتی سلوک آ دیر بھلا بھلا جھیل تا منظر ءِپیش کننگ ءِ ہراڑے لکھ آ بندغ آتے فصل آتیان خور دوئی مرسا کرینے و ساہدار لکھ آ خاہوت آتا کفالت نا ذریعہ جوڑ مرسا کرور۔ اوپارے کہ نوکاپ نا سوب آن داسہ ہم سد آ پول آک پنوک ءُ، 8000 کلومیٹرآ ن زیات سڑک آتے دیر درینے، نوکاپی دیر انا پیش تمپننگ نا سوب آن دیر آن ودی مروک آ ناجوڑی تا سوب آن جان جوڑی نا تنکی ودی مننگ نا گڑتی ءِ، نن ہلہلہ ئی گام گیج کرینن، اقوام متحدہ نا ادارہ، جہانی ادارہ جان جوڑی و ایلو شونداری شریدار آتا منت وار اُن ہرافک دا بھلا چیلنج تون مون تننگ اٹ ننا کمک ءِ کرینو ولے موسمیاتی بھسکاری ننا راجی و اقتصادی نظام ءِ بھاز نسخان تسنے۔ وزیراعظم پارے کہ نوکاپ نا سوب آن ننا 30 ارب ڈالر آن زیات نا نسخان مسنے۔ اوپارے کہ ننا بحالی نا سفر ودوک آ وام، توانائی نا جہانی کہول آ نہاد آتیٹی ودکی، موافقت فنڈ اسکان حقی رسینگ مفننگ آن زہمی مریک۔ اوپارے کہ ننا راجی رکھ انا پروگرام بی آئی ایس پی 2.8 ملین نیزگارخاہوت آتیٹی 70 ارب روپئی (316 ملین امریکی ڈالر) نا زر دمدستی وڑاٹ بشخا، نن قومی کمکی کوشست آتیکن غٹ دوئی وسیلہ غاتے کاریم اٹ ایسونن، و بجٹ نا غٹ اولیت آتے متعین کرینن ہرافتے ٹی شونداری فنڈ ہم اوار ءِ، نن نم و نما ٹیم انا کوشست و نوکاپ زہمی تیکن اپیل آتا ستاءِ کینہ ولے لکھ آ بندغ آتے رہائش و خور انا فراوانی کن داسہ بھاز گڑاکروئی تمک۔ اوپارے کہ موسمیاتی تنکی و جہانی درجہ حرارت نا سوب آن ودی مروک آ حالیت آتون مون تننگ نا گرج ءِ و پاکستان نا زہمی ملک مننگ نا ناطہ ننا مسخت ءِ کہ کلائیمیٹ فنانس نا ہدف آتے دوئی کننگے، نن موسمیاتی ایجنڈا نا بابت نسخان نا پوروی نا خواہندار اُن و پراومیت اُن کہ غٹ ملک آک کوپ 27 نا دیوان اٹی ہندا جوزہ اتون بشخ ہلیرہ کہ غٹ اکن موسمیاتی انصاف نا گرج  ءِ۔ وزیراعظم پارے کہ دا حالیت آتے پورو بھسکاری نا کنڈا دننگپ، و ننے دا حالیت آتیٹی اسہ عزم انا وڑاٹ ڈٹ بندی کننگے انتئے کہ انت اس کہ پاکستان اٹی مسنے او پاکستان اسکان محدود سلپک۔