وزیراعظم شہباز شریف نا سعودی ولی عہد تون اوڑدہی ، کثیر الجہتی شریداری ءِ پین سوگوی تننگ نا عزم انا درشان

شرم الشیخ۔ 08 نومبر (اے پی پی) وزیراعظم شہباز شریف پاکستان و سعودی عرب نا نیام اٹ ودوک آ بڑزکو کہولی رابطہ غاتیا است جمی نا درشانی ءِ کرسا پارینے کہ پاکستان سعودی عرب تون کثیر الجہتی شریداری ءِ پین سوگوی تننگ نا عزم تخک، سعودی ولی عہد نا دورہ ءِ پاکستان تین پہ تینی است خواہی نا غٹ بشخ آتیٹی ہڑتوم آ کنڈآتا کمکاری ءِپین زیات کننگ اٹ کمکار مریک۔ داخیال آتا درشانی ءِ او سعودی عرب نا ولی عہد و وزیراعظم شہزادہ محمد بن سلمان بن عبدالعزیز السعود تون گپ وتران کرسا کرے، ہڑتوم آ راہشون تا نیام اٹ اوڑدہی شرم الشیخ اٹی "کوپ ۔ 27 سمٹ ” نا وخت آ مس۔ اوڑدہی ٹی ہڑتوم آ راہشونک چندی بشخ آتیٹی برجا کمکاری ءِ پین ودفنگ کن ہڑتوم آ کنڈآتا تعلقداری تا جاچ ءِ ہلکر و تین پہ تینی است خواہی نا علاقائی و جہانی امور آ ہم گپ وتران کریر۔ وزیراعظم داہیت انا درشانی ءِ کرے کہ پاکستان سعودی عرب تون تینا برادرانہ رابطہ غاتے بھاز اہمیت ایتک ہرافتا ماسک اسیجائی عقیدہ، دودوربیدگ و قدر و تین پہ تینی مخ تفی نا بے مٹ روایت اٹی تفوک ءُ۔ وزیراعظم پارے کہ پاکستان نا الس خادم حرمین الشریفین شاہ سلمان بن عبدالعزیز السعود نا بھاز شرف و سعودی عرب نا الس تون مہرومریبت کیک۔ وزیراعظم مملکت اٹی کاریم کروک آ 20 لکھ پاکستانی تیکن سعودی عرب نا مہمانداری و کمکاری نا ہم ستاءِ کرے ہراہڑتوم آ ایلم ملک آتا شونداری، شونہالی و اقتصادی پیش رفت اٹی تینا کڑد ءِ ادا کننگ ءُ ۔ ریاض اٹی تینا ساڑی آ اوڑدہی نا ذکر ءِ کرسا وزیراعظم شہباز شریف و ولی عہد شہزادہ محمد بن سلمان ودوک آ بڑزکو کہول انا رابطہ غاتیا است جمی نا درشانی ءِ کریر۔ ہڑتوم آ راہشونک ہڑتوم آ ملک آتا نیام اٹ کثیر الجہتی شریداری ءِ پین سوگوی تننگ نا عزم انا درشانی ءِ کریر۔ سعودی ولی عہد نا پاکستان نا بروک آ دورہ نا چاری وزیراعظم پارے کہ اودے پت ءِ کہ دا دورہ تین پہ تینی است خواہی نا غٹ بشخ آتیٹی ہڑتوم آ کنڈآتا کمکاری ءِ پین زیات کننگ اٹ کمکار مریک۔ اوخاص وڑاٹ ہڑتوم آ ایلم ملک آتا الس نا تین پہ تینی فائدہ غاتیٹی پاکستان و سعودی عرب نا نیام اٹ واپار، زرکاری، شونداری وا لس نا نیام اٹ رابطہ غاتے ودفنگ نا اہمیت آ زور شاغا۔ پاکستان نا نوکاپ آن زہمی مخلوق کن سعودی عرب نا امداد نا ستاءِ کرسا وزیراعظم پارے کہ پاکستان چاگڑدی بدلی نا اثر آتیان غٹ آن زیات زہمی مروک آ ملک آتیان اسٹ ءِ۔ اواومیت ظاہر کرے کہ خاص وڑاٹ پدتموک ملک آتیٹی چاگڑدی سوب آن مروک آ زیان و نسخان نا مالی کمکاری آ چکار کننگ نا بابت "کوپ ۔27” نا پبی ءُ بھرم اس دوئی مریک۔ وزیر اعظم "مڈل ایسٹ گرین انیشی ایٹو” نا رداٹ مربوط چاگڑدی گام انا فعالیت آ ولی عہد نا کوشست آتا ہم ستاءِ کرے و سعودی سرکڑدہ غاتے پاکستان نا کنڈآن پورو کمکاری نا باور کرفے۔