اسلام آباد۔ 07 نومبر (اے پی پی) صدر آزاد کشمیر بیرسٹر سلطان محمود چوہدری تون وزیراعظم سردار تنویر الیاس خان ایوان صدر کشمیر ہاؤس اٹی اہم ءُ اوڑدہی اس کرے۔ داوخت آ صدر بیرسٹر سلطان محمد چوہدری پارے کہ اوورسیز کشمیری کشمیر ناویل ءِجہانی کہول آ جارحانہ وڑاٹ ہرفینو و اوفتے ٹی مہالو آن ہم زیات جوش و ولولہ ءِ۔ پیشن نا ملک کشمیریک کنتون اواری اٹ 24 ستمبر آ اقوام متحدہ نا جنرل اسمبلی تون بھارتی وزیراعظم نا تران نا وخت آ نیویارک اٹی اقوام متحدہ نا دفتر نا مون آ زبردست برانزی مچی اس کریر وخت اس کہ ہنداوڑ 27 اکتوبر آہم واشنگٹن اٹی بھارتی سفارت خانہ نا مون آ کشمیریک زبردست برانزی مچی اس کریر ہراٹی ای تینٹ ہم بشخ ہلکٹ۔ ای امریکہ نا چندی ریاست آتا دورہ ءِ کریٹ و ہموڑے رہینگوک آکشمیری تیا زور شاغاٹ کہ او کشمیر نا ویل ءِجہانی کہول آ تالان کننگ کن کمربستہ مریر۔ کشمیر نا ویل انا اہم و نازرک موڑ آ آجوئی نا بیست کیمپ آن ہم ننا دا اولی زمواری مریک کہ نن داکان کشمیر نا ویل انا ایسری کن و بھارت نا غیرکانودی کوزہ ٹی جموں وکشمیر اٹی انسانی حق انا لتاڑتے بند کرفنگ کن ہر فورم آ گچین وڑاٹ توار بڑ ز کین۔ آزاد کشمیر اٹی بلدیاتی گچین کاری تا اڈتننگ آن اقتدار شیفکو کہول اسکان منتقل مریک و داڑان الس نا چنکا بھلا ویل آتا ایسر مننگ اٹ کمک رسینگک۔ بلدیاتی گچین کاری تیکن بنجائی حکومت سیکورٹی ایتک۔ داوخت آ صدر آزاد جموں وکشمیر بیرسٹر سلطان محمود چوہدری و وزیراعظم آزاد کشمیر سردار تنویر الیاس خان نا نیام اٹ آزاد کشمیر اٹی گڈ گورننس نا قیام کن کوشست آتے ترند کننگ آ ہم امنائی سلاہ کننگا۔ داوخت آ وزیراعظم آزاد کشمیر سردار تنویر الیاس خان صدر بیرسٹر سلطان محمود چوہدری ءِ اونا سرسہب دورہ ءِ امریکہ ٹی کشمیر نا ویل ءِ جہانی کہول آ تالان کننگ نا کوشست آتا ستاءِ کرے۔ ہڑتوم آ راہشونک تین پہ تینی است خواہی نا امور آ گپ وتران کریر۔
