اسلام آباد۔ 07 نومبر (اے پی پی) صدر مملکت ڈاکٹر عارف علوی سندھ انا ضلع گھوٹکی ٹی داڑیل آتا جلہو اٹی برمتہ مروک آنا بازیابی کن آپریشن اٹی شہید مروک آ پولیس کارندہ غاتا زوال کننگ آ است ہسونی نا درشانی ءِ کرینے۔ ایوان صدر نا پریس ونگ آن دوشنبےنادے آ جاری بیان نا رداٹ صدر مملکت ڈی ایس پی عبدالمالک بھٹو، انسپکٹر عبدالمالک کمانگر، سب انسپکٹر دین محمدلغاری ، کانسٹیبل جتوئی خان پتافی و محمد سلیم چاچڑ تون اوار شہید پولیس کارندہ غاتے خراج عقیدت پیش کرے و اوفتا درجہ غاتا بڑزی کن دعا کرے۔ پولیس کارندہ غاک گھوٹکی ٹی پوسکن آ سلہہ غاتیان شپ 150 آن زیات سلہہ بند داڑیل آتا جلہو اٹی شہید مسوسر۔ اوشہید پولیس کارندہ غاتیکن جنت الفردوس و جلہو اٹی ٹھپی مروک آ انسپکٹر غلام علی بروہی، کانسٹیبل آفتاب احمد بھٹو و ممتاز علی سومرو نا زوت دراخ جوڑی کن دعا کرے۔ صدر ڈاکٹر عارف علوی پولیس کارندہ غاتا ہمت و نرزوری نا ستاءِ کرسا پارے کہ شاری تے رکھ، سلامتی و ذہنی سکون فراوان کننگ ریاست نا زمواری ءِ۔ صدر مملکت پارے کہ حکومت تینا واکداری ٹی غٹ المی وسیلہ غاتے کاریم اٹ اتے، داوڑنا واقعہ غاتون سختی اٹ مون تننگ نا گرج ءِ۔ او ہمو بنداوی سوب آتے ایسر کننگ نا گرج آ ہم زور شاغا ہراشاری تے راج اکن اسہ خطرہ سے ٹی بدل کننگ کن بیوس کیرہ۔
