شرم الشیخ۔ 07 نومبر (اے پی پی) وزیراعظم محمد شہباز شریف و متحدہ عرب امارات نا صدر محمد بن زید النہیان تین پہ تینی فائدہ غاتا اسیجائی مسخت آتیکن اواری اٹ کاریم کننگ آامنائی کرینو۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم شہباز شریف و متحدہ عرب امارات نا صدر محمد بن زید النہیان مصر اٹی کوپ 27 سروکی دیوان ناوخت آ اوڑدہی کریر۔ داوخت آ وزیراعظم شہباز شریف نوکاپ زہمی تا است انا بھلنی اٹ امداد آ متحدہ عرب امارات نا سرکڑدہ و الس نا منت واری ءِ ہرفے۔ وزیراعظم موسمیاتی بدلی تا اثرآتا مقابلہ ءِ کننگ کن کوپ 27 نا عزم ءِ نیک بختی اس گوندا۔ وزیراعظم داوخت آ گپ وتران کرسا پارے کہ موسمیاتی بدلی تا اثرآتون مون تننگ بیرہ پدتموک ملک آتا وس اٹی اف، جہانی برادری ءِ اواری اٹ کرہ ارض انا بقانا اسیجائی چارٹر اس جوڑ کروئی مریک۔ وزیراعظم شہباز شریف کوپ 27 کانفرنس نا گرج و مسخت آتیکن جہانی برادری خاص وڑاٹ اسلامی دنیا نا عزم انا ستاءِ کرے۔ ہڑتوم آ راہشونک تین پہ تینی فائدہ غاتا اسیجائی مسخت آتیکن اواری اٹ کاریم کننگ آ امناکریر۔
