شرم الشیخ۔ 07 نومبر (اے پی پی) وزیراعظم محمد شہباز شریف تون کوپ 27 سروکی کانفرنس نا وخت آ عراق، تاجکستان، انڈونیشیانا صدر و لبنان نا وزیراعظم ئسک اوڑدہی کریر۔ دوشنبےنادے آ وزیراعظم آفس نا میڈیا ونگ آن جاری بیان نا رداٹ مصر اٹی موسمیاتی بدلی تا جہانی کانفرنس نا وخت آ پاکستان اٹی نوکاپ و زہمی تا کمک کن کوشست آتیا وزیراعظم پاکستان شہباز شریف مرکز نگاہ جوڑ مس، جہانی راہشونک وزیراعظم نا نوکاپ زہمی علاقہ غاتیٹی پدریسہ ساڑی گری ءِ بھلو جوزہ اس گوندار۔ کانفرنس نا اولیکو دے وزیراعظم شہبازشریف اختہ ءُ دے اس گدریفے۔ اوکوپ 27 سروکی کانفرنس نا وخت آ شرم الشیخ انٹرنیشنل کانگریس سینٹر اٹی اہم جہانی راہشون تتون اوڑدہی کرے۔ وزیراعظم تون عراق نا صدر عبدالطیف راشد، تاجکستان نا صدر امام علی رحمان، انڈونیشیا نا سدر جوکوویدودو ئسک جتا جتا اوڑدہی کریر۔ وزیراعظم شہباز شریف تون لبنان نا وزیراعظم نجیب میکاتی ہم اوڑدہی کرے۔ وزیراعظم شہباز شریف انڈونیشیا نا صدر تون گپ وتران کرسا پارے کہ کنوئی آ تیل انا دمدستی فراوانی آ نا بھاز منت واری ءِ ہرفنہ۔ انڈونیشیا نا صدر پارے کہ پاکستان ننا ایلم ءِ ، ہرممکن کمک آ خوشی مریک۔ وزیراعظم شہباز شریف انڈونیشیا نا حکومت و الس کن نیک است خواہی نا کلہو تس۔ وزیراعظم تاجکستان نا صدر امام علی رحمان تون اوڑدہی کرے۔ داوخت آ وزیراعظم پارے کہ تاجکستان نا صدر اینخو دسمبر اٹی پاکستان آ بریک۔ ہڑتوم آ راہشون تیٹی موسمیاتی بدلی نا بھسکار اثرآتیا گپ وتران مس۔ درملکی راہشونک پاکستان اٹی نوکاپ آن مروک آ بھسکاری و جانی نسخان تیا است ہسونی نا درشانی ءِ کریر۔ وزیراعظم شہباز شریف پارے کہ موسمیاتی بدلی تیان مچ آ دنیا زہمی مننگ ءِ ، اونا منفی اثرآتے کم کننگ کن اجتماعی کوشست المی ءِ۔ وزیراعظم نوکاپ نا زہمی تا امداد آ جہانی برادری نا منت واری ءِ ہرفے۔ اوڑدہی ٹی جہانی راہشونک ہڑتوم آ کنڈآتا، علاقائی و جہانی امور آ ہم گپ وتران کریر ۔
