اسلام آباد۔ 04 نومبر (اے پی پی) بی آئی ایس پی و نادرا نا نیام اٹ ڈائنامک رجسٹری نا رداٹ پوسکن آ سروے کن ہڑتوم آ کنڈآتا معاہدہ غا دستخط کننگا۔ معاہدہ نا رداٹ نادرا مچ آ ملک اٹی 647 ڈائنامک رجسٹری دفترجوڑ کیک ہرا زالبول آک اولیکو سروے ٹی اوار مننگ کتور ، بی آئی ایس پی اوفتے کن ڈائنامک رجسٹری نا رداٹ پوسکن آ سروے نا بست وبند ءِ کننگ ءِ۔ داسروے ٹی درخواست تروک تینا اُرانا معلومداری ٹی ہروڑنا بدلی ءِ دمدستی وڑاٹ رجسٹر کرفنگ کیک۔ بنجائی وزیر شازیہ مری پارے کہ بی آئی ایس پی و نادرا نا شریداری مریس مدتی و بھاز موثر ءِ۔ معاہدہ نا رداٹ نادرا حقدار خاہوت آتے مالی امداد نا دمدستی فراوان کن پوسکن رجسٹریشن کن ڈیٹا اس مہیا کیک۔ بی آئی ایس و نادرا نا شریداری حقدار خاہوت آتا مستند و فریش ڈیٹا نا دوئی کننگ نا کنڈا اہم ءُ پیش رفت اسے۔ حقدار زالبول آتے مالی کمکاری شہید گودی بینظیر بھٹو نا وژن ئسک۔ اسہ ہم حقدار خاہوت اسے مالی کمکاری آن محروم کننگپک۔ ہراحقدار خاہوت آتے سسٹم آن کشنگاسس اوفتے پوسکن آ سروے نا بنداو آ دُوارہ اوار کننگک۔ چیئرمین نادرا پارے کہ ڈائنامک رجسٹری نا مسخت پوسکن آ درخواست گزار و مہالو آن درج مروک مسہ نیم کروڑ اُراتا دُوارہ سروے ءِ پک کننگ ءِ۔ ڈائنامک رجسٹری نا کمک اٹ درخواست گزار تا ازدواجی حیثیت، معذوری، خاہوتی کوائف و بائیو میٹرک ءِ نادرا ڈیٹابیس نا رداٹ اپ ڈیٹ کننگک۔ ڈائنا مک رجسٹری نا نظام ڈیٹا بیس نا کمک اٹ نامطلوب شمولیت یا اخراج نا ردینک آتا پیدواری ءِ ہم کیک۔
