لاہور۔ 04 نومبر (اے پی پی) لاہور ہائی کورٹ عمران خان ءِ چیئرمین تحریک انصاف نا عہدہ غان اینک کننگ کن دائر درخواست ءِ قابل سماعت گوندسا اٹارنی جنرل ءِ 11 نومبر آ عدالتی کمکاری کن طلبی نا نوٹس جاری کرے۔ داکان مست عدالت پنچ شنبےنادے آ درخواست نا قابل سماعت مننگ نا فیصلہ ءِ ڈک کریسس۔ جمعہ نادے آ عدالت فیصلہ ءِ بنفسا دائر درخواست ءِ قابل سماعت گوندا۔ عدالت اٹارنی جنرل ءِ نوٹس جاری کرسا 11 نومبر آ عدالتی کمکاری کن بٹنگا۔ عدالت نا روبرو درخواست گزار محمد آفاق ایڈووکیٹ موقف اختیار کرینے کہ توشہ خانہ کیس اٹی الیکشن کمیشن عمران خان ءِ نابود کرینے۔ آئین نا رداٹ نابود بندغ سرکاری، حکومتی عہدہ یا سیاسی جماعت اسے نا سروکی ءِ کننگ کپک۔ نابودی آن پد عمران خان تحریک انصاف نا چیئرمین شپ نا عہدہ غا سلنگ نا ہچ ءُ کانودی سوب اس تخپک۔ خواست ءِ کہ عدالت عمران خان ءِ چیئرمین تحریک انصاف نا عہدہ آن اینک کننگ نا پرمان جاری کے۔ مستی خواست ءِ کہ عدالت تحریک انصاف ءِ پوسکن آ چیئرمین مقرر کننگ نا ہم پرمان ایتے۔
