عمران خان آ سم کاری نا واقعہ نا پورو جاست وپاست مرے، بنجائی وزیر شازیہ مری

اسلام آباد۔ 04 نومبر (اے پی پی) بنجائی وزیر بے نظیر انکم سپورٹ پروگرام شازیہ مری پارینے کہ مسکوہی وزیراعظم عمران خان آ سم کاری ناواقعہ نا پورو جاست وپاست مرے، پی ٹی آئی نا کنڈآن جاست و پاست آن مست دوبہ خلنگ غیرزموارانہ طرز عمل اسے۔ جمعہ نادے آ قومی اسمبلی نا دیوان اٹی گپ وتران کرسا شازیہ مری مسکوہی وزیراعظم عمران خان نا کنٹینر آ سم کاری نا واقعہ نا مذمت ءِ کرسا پارینے کہ برانز کننگ ہر جماعت نا آئینی و جمہوری حق ءِ ، پرامن برانز اٹی خونریزی و اشتعال انگیزی بایدے مف۔ اوپارے کہ داواقعہ نا پورو جاست وپاست مننگ المی ءِ وداٹی ہچ ءُ سقم اس سلپ، دابھلو واقعہ اسے و بطور سیاسی کارندہ کہ نن خوانہ کہ اونا پورو جاست وپاست مرے۔ اونا پاننگ ئس کہ پاکستان پیپلزپارٹی انت کہ برداشت کرے نن خواپنہ کہ پین سیاسی جماعت اسے آ داوخت برے، ننا چیئرمین بلاول بھٹو زرداری عمران خان نا زوت دراخ جوڑی کن نیک است خواہی نا درشانی ءِ کرینے۔ اوپارے کہ پیپلزپارٹی مدام ملک اٹی جمہوری چرجوئی کن تینا کڑد ءِ ادا کرے، پی ٹی آئی نا کنڈآن بیدس شاہدی و جاست وپاست آن مسہ مخلوق آ دوبہ خلنگ غیرزمواری اسے، عمران خان داوڑنا سٹی آ بیان تیان بایدے پاناد کے۔