اسلام آباد۔ 04 نومبر (اے پی پی) پاکستان و ایشیائی شونداری بینک خیبرپختونخواٹی جان جوڑی نا سوگو نظام پروگرام کن 100 ملین ڈالر نا مالیاتی معاہدہ غا دستخط کریر۔ وزارت اقتصادی امور نا سیکرٹری ڈاکٹر کاظم نیاز حکومت پاکستان وخت اس کہ ایشیائی شونداری بینک انا کنڈآن پاکستان ریذیڈنٹ مشن نا کنٹری ڈائریکٹر یونگ یی معاہدہ غا دستخط کریر۔ خیبرپختونخوا حکومت و ایشیائی شونداری پروگرام نا نیام اٹ صوبہ ٹی پروگرام نا نفاذ کن اسہ پین معاہدہ سے آہم دستخط کننگا۔ دستخط آتا دود اٹی بنجائی وزیر اقتصادی امور سردار ایاز صادق ہم ساڑی ئسک۔ داوخت آ پاننگاکہ نتیجہ خیز وام پروگرام بنداوی پنجر و ازباب آتے پوسکن کرسا ثانوی ہسپتال آتیٹی جان جوڑی نا خذمت آتا فراوانی ءِ گچین کننگ اٹ کمکار مریک۔ معاہدہ نا رداٹ کلینیکل پروٹوکول، آب و راہشون وڑتیا عملدرآمد ءِ پک کننگ ، انسانی وسیلہ غاتا ڈٹ بندی و دوائی تا سپلائی چین نا بست وبند ءِ گچین کننگک۔ داپروگرام نا مسخت خیبرپختونخوا ٹی جان جوڑی نا ثانوی نظام ءِ بدل کننگ ءِ۔ پروگرام آن کم و ود 38 ملین بندغ فائدہ ہرفرہ ہرافتے ٹی زالبول آک ہم اوار ءُ، پروگرام آن زالبول آتا جان جوڑی نا خیال تخنگ نا خذمت آتیٹی گچینی و چناتا مرک آتا کچ اٹی کمتی بریک۔ یات سلے کہ تدوک آ تُو وزارت اقتصادی امور ایشیائی شونداری بینک اتون 1.5 ارب ڈالر نا معاہدہ غاہم دستخط کریسس وخت اس کہ بلوچستان، خیبرپختونخوا و سندھ اٹی نوکاپ آن زہمی بنداوی پنجر نا بحالی و پوسکن تفنگ کن ساڑی آ شونداری ڈٹ آتیان 475 ملین ڈالر ہم دُوارہ خڑچ کننگ انگ ءِ۔ بنجائی وزیر سردار ایاز صادق داوخت آ پارے کہ جہانی شونداری شریدار آتیان رعایتی وام تا بست وبند ءِ کرسا نوکاپ آن پد انا حالیت آتیٹی گچین آن گچین تعمیرات اٹی صوبائی حکومت آتا کمک ءِ کننگک۔
