اسلام آباد۔ 04 نومبر (اے پی پی) سعودی عرب و پاکستان نا سپریم کوآرڈنیشن کونسل (ایس پی ایس سی سی ) نا سیاسی و سیکورٹی بارواٹ جوڑ مشترکہ ورکنگ گروپ نا دیوان اسلام آباد اٹی مس۔ دفترخارجہ نا ترجمان نا کنڈآن جاری بیان نا رداٹ دیوان نا اسیجائی کماشی ءِ قائم مقام سیکرٹری خارجہ جوہر سلیم و سعودی عرب نا نائب وزیر سیاسی امور ڈاکٹر سعود بن محمد الساطی ئسک کریر۔ دیوان اٹی تین پہ تینی است خواہی نا گیشتر سرحال آتیا سرجمی اٹ گپ وتران کننگا۔ فریق آک سیاسی و سیکورٹی نا بشخ آتیٹی متکن آ ہڑتوم آ کنڈآتا تعلقداری تے پین سوگو کننگ نا عزم کریر۔ ہڑتوم آ ملک آتا ڈل آک تینا خڑک انا ہمسایہ و گیشتر ڈیہہ نا سیاسی و سیکورٹی حالیت آتیا ہم گپ وتران کریر۔ گپ وتران اٹی ساڑی آ وخت اٹی مون آ بروک آ حالیت آتا بابت ہڑتوم آ ملک آتا نیام اٹ خیال آتیٹی یکسانیت ئسک۔ فریق آک اسیجااست خواہی نا ہڑتوم آ کنڈآتا ، علاقائی و جہانی امور آ رابطہ کاری و سلابت ءِ برجاتخنگ آ امنا کریر۔ جوائنٹ ورکنگ گروپ نا دیوان آن پد پولیٹکل اینڈ سیکورٹی سٹون نا وزارتی کمیٹی نا دیوان اٹی امنائی سلا ہ نا سلاہ تے گڈیکو دروشم اس تننگک۔ سعودی عرب پاکستان سپریم کوآرڈنیشن کونسل اسہ بڑزکوکہولی ادارہ جاتی فریم ورک اسے ہرا 2019 اٹی پاکستان و سعودی عرب نا نیام اٹ جوڑ کننگاسس۔ دا سیاسی و سیکورٹی، اقتصادی و راجی و دودوربیدگی مسہ تمبہ غاتیا تالان ءِ۔ کونسل نا مسخت تینا فریم ورک نا رداٹ امنائی کمکاری نا بشخ آتا بابت فیصلہ سازی و عملدرآمد ءِ ادارہ جاتی جوڑ کننگ و اودے ترند کننگ ءِ۔ بیان نا رداٹ پاکستان سعودی عرب تون تینا متکن، برادرانہ تعلقداری تے بھاز اہمیت ایتک ہرا اسیجائی مذہب، اسیجائی قدر و دودوربیدگ اٹ سوگوی اٹ گنڈوک ءُ۔
