اسلام آباد۔ 03 نومبر (اے پی پی) الیکشن کمیشن کراچی ٹی بلدیاتی گچین کاری تا اڈتننگ کن 9 نومبر آ غٹ فریق آتا سماعت نا فیصلہ کرینے وخت اس کہ جماعت اسلامی، ایم کیو ایم پاکستان، ایم کیو ایم و پیپلزپارٹی آن ہم موقف ہلنگک۔ پنچ شنبےنادے آ کمیشن نا اہم دیوان چیف الیکشن کمشنر سکندر سلطان راجہ نا کماشی ٹی مس۔ دیوان اٹی الیکشن کمیشن نا باسک آتیان بیدس سیکرٹری الیکشن کمیشن و اسپشل سیکرٹری الیکشن کمیشن ئسک بشخ ہلکر۔ دیوان اٹی الیکشن کمیشن ءِ کراچی ٹی بلدیاتی گچین کاری تا اڈتننگ نا بابت صوبائی حکومت نا رپورٹ آن معلومدار کننگاکہ صوبائی حکومت سندھ تینا رپورٹ اٹ نوشتہ کرینے کہ بلدیاتی گچین کاری تا اڈتننگ کن پولیس نا نفری گنج اس اف و سندھ انا ایلو ضلع غاتیان طلب کننگ ممکن اف پین پولیس کارندہ وزارت داخلہ نا ددرخواست آ اسلام آباد آ گدریفنگانے۔ داکان بیدس کووڈ ویکسی نیشن و انٹرنیشنل دفاعی نمائش و سیمینار اٹی اوفتا تعیناتی ہم المی ءِ۔ ہنداخاطران کراچی ٹی بلدیاتی گچین کاری تا پرامن اڈتننگ ناممکن ءِ۔ ڈائریکٹر جنرل ایکسپورٹ پروموشن آرگنائزیشن اسہ چٹھی اس وزارت دفاع ءِ نوشتہ کرینے کہ انٹرنیشنل دفاعی نمائش و سیمینار 15 آن 18 نومبر 2022 نا نیام اٹ کراچی ایکسپوسینٹر اٹ اڈہلنگ ءِ ہرانا کاپی الیکشن کمیشن آف پاکستان ءِ گدریفنگانے۔ ڈائریکٹر جنرل وزارت دفاع ءِ معلومدار کرے کہ ہڑتوم آ دود آک یعنی دفاعی نمائش و سیمینار و کراچی نا بلدیاتی گچین کاری تے اسہ وار سیکورٹی مہیا کننگ کانود نافذ کروک آ ادارہ غاتیکن مشکل مریک۔ ہنداخاطران الیکشن کمیشن ءِ اونا غٹ پلو آتیان ہم معلومدار کننگے تانکہ اودے گچین کاری تا تاریخ نا فیصلہ ءِ کننگ اٹی آسانی مرے۔ الیکشن کمیشن جماعت اسلامی نا کنڈآن دمدستی گچین کاری تا اڈتننگ نا چٹھی آ ہم غور کرے و فیصلہ کرے کہ لوکل گورنمنٹ گچین کاری تا کیس ءِ الیکشن کمیشن اٹی سماعت کن مورخہ 9 نومبر 2022 آ مقرر کننگے ہراٹی سیکرٹری داخلہ، چیف سیکرٹری و آئی جی سندھ ءِ نوٹس جاری کننگے۔ دیوان اٹی جماعت اسلامی پاکستان، پاکستان تحریک انصاف ، پیپلزپارٹی و ایم کیو ایم پاکستان ءِ ہم بٹنگک تانکہ او اگہ تینا موقف ءِ پیش کننگ خوار تو پیش کیر تانکہ کراچی نا غٹ ضلع غاتیٹی بلدیاتی گچین کاری تا اڈتننگ نا تاریخ نا فیصلہ غٹ فریق آتے بِننگ آن پد کننگ مرے۔
