اسلام آباد۔ 02 نومبر (اے پی پی) صدر مملکت نااُرائی بیگم ثمینہ عارف علوی پارینے کہ بریسٹ کینسر اسہ درمان نا قابل ءُ مرض اسے ولے داڑکن وخت آتشخیص و درمان المی ءِ۔ سندھ اٹی 13، پنجاب اٹی 8، اسلام آباد اٹی 3، خیبرپختونخوا ٹی 5 و بلوچستان اٹی 3 ہسپتال میموگرافی نا مفت آسراتی فراوان کننگ ءِ۔ داخیال آتا درشانی ءِ او چارشنبےنادے آ ہیلتھ سروسز اکیڈمی ٹی بریسٹ کینسر آگاہی دود آن تران کرسا کرے۔ بیگم ثمینہ عارف علوی پارے کہ سینہ نا کینسر نا بابت پاکستان اٹی داسہ سہی وڑاٹ ہیت کننگ انگءِ۔ اومیت ءِ نن زیات آن زیات زالبول آتیٹی بریسٹ کینسر نا بارواٹی آگاہی ودی کننگ نا کوشست اٹی سرسہب مرینہ و داڑے ساڑی زالبول آک دا کلہو ءِ ایلوفتسکان سرکیرہ۔ اوپارے کہ سینہ نا کینسر زالبول آتیٹی مرو ک آ عام ءُ کینسر اسے و پاکستان اٹی ہر 9 آن اسہ زالبول ءِ مننگ نا خطرہ ءِ۔ پاکستان اٹی ہرسال کم و ود 90 ہزار آن اسہ لکھ نا خڑک مخلوق اٹی بریسٹ کینسر مریک ولے است ہسونی نا ہیت دادے کہ کم و ود پنجاب درسد مریض داناجوڑی نا سوب آن مرک انا باہ ٹی کاہک ۔ اگہ نن دا ناجوڑی نا سوب آن مرک انا کچ آتا موازنہ ءِ ہزگار ملک آتون کین تو معلوم مریک کہ ہموڑے 5 سال اٹی بچفنگ نا کچ کم و ود 80 درسد ءِ وخت اس کہ پاکستان اٹی داناجوڑی نا سوب آن مرک آتا کچ کم و ود 50 درسد ءِ۔ دااسہ بھاز خطرناک ءُ حالیت اسے۔
