بیجنگ۔ 02 نومبر (اے پی پی) وزیراعظم محمد شہباز شریف بیجنگ نا عظیم عوامی ہال اٹی چین نا صدر شی جن پنگ تون اوڑدہی کرے ہراٹی ایم ایل ون ءِ بنائی ہارویسٹ ڈٹ انا وڑاٹ بناءِ کننگ کن اسیجائی کوشست آتیا امنا کننگا وخت اس کہ چینی صدر پاکستان کن 50 کروڑ یوان نا ودکی امداد نا پڑو ءِ کرے۔ اوڑدہی ٹی بھارت نا غیر کانودی کوزہ گیری ٹی جموں وکشمیر نا حالیت و سی پیک نا اوغانستان اسکان ودفنگ آ ہم گپ وتران کننگا۔ وزیراعظم آفس نا میڈیا ونگ آن چارشنبےنادے آ جاری بیان نا رداٹ وزیراعظم چینی کمیونسٹ پارٹی نا 20 می مرکزی کمیٹی نا دُوارہ جنرل سیکرٹری گچین مننگ آ صدر شی جن پنگ ءِ مبارکبادی تس۔ اوملک اٹی است ہسون نوکاپ آن مروک آ بھسکاری نا رداٹ پاکستان نا امداد، بحالی و تعمیر نو نا کوشست آتیٹی چین نا کمک آ ہم اونا منت واری ءِ ہرفے۔ ہڑتوم آ راہشونک پاک چین ہڑتوم آ کنڈآتا تعلقداری ٹی پیش رفت نا جاچ ءِ ہلکر و تین پہ تینی است خواہی نا علاقائی و جہانی امور آ گپ وتران کریر۔ اوفک ہڑتوم آ ملک آتا نیام اٹ اسٹریٹجک کوآپریٹو پارٹنر شپ کن تینا وابستگی نا درشانی ءِ کریر ہرا ہر آزمائشت آ پورو سلیسنے۔ ہڑتوم آ ملک آک امن، سوگوی ، شونداری و شونہالی نا تینا اسیجائی وژن ءِ عملی ءُ دروشم اس تننگ اٹ سوگوی اٹ ہم کوپہ سلوک ءُ۔ چین اتون پاکستان نا یکتا تاریخی تعلقداری و علاقائی امن وسوگوی کن ہڑتوم آ کنڈآتا سنگتی نا عزم انا درشانی ءِ کرسا وزیراعظم شہباز شریف داہیت انا پبی درشانی ءِ کرے کہ پاک چین سنگتی پاکستان اٹی سیاسی کہول آ پورو امنائی سلاہ تخک و دا بین الریاستی تعلقداری نا اسہ وڑاسے۔ وزیراعظم چین نا شونہالی کن صدر شی جن پنگ نا کماشی و ہڑتوم آ کنڈآتا تعلقداری تے سوگو کننگ کن اونا وژن ءِ خراج تحسین پیش کرسا پارے کہ پاکستان ءِ چین نا راجی و اقتصادی شونداری و ملک انا شونداری و شونہالی نا قومی عزم اٹ تحریک ملانے۔ ہڑتوم آ راہشونک دفاع، واپارو زرکاری، کشت وکشار، جان جوڑی ، تعلیم، گرین انرجی، سائنس و ٹیکنالوجی و آفت آتون مون تننگ کن تیاری تون اوار چندی امور آ کمکاری آ گپ وتران کریر۔ او فک سی پیک کن تینا تین پہ تینی وابستگی نا درشانی ءِ کریر و داہیت ءِ تالان کریر کہ سی پیک نا بڑزکو آب اٹ شونداری پاکستان و چین نا نیام اٹ ہڑتوم آ کنڈآتا تعلقداری تے پین سوگو کیک۔ ہڑتوم آ راہشونک داہیت آ امنا کریر کہ سٹریٹجک اہمیت نا ڈٹ انا وڑاٹ ہڑتوم آ فریق سی پیک نا فریم ورک نا رداٹ ایم ایل ون ءِ بنائی ہارویسٹ ڈٹ انا وڑاٹ بناءِ کننگ کن اسیجائی کوشست کیرہ۔ اوفک کراچی ٹی ماس ٹرانزٹ ڈٹ انا گرج ءِ ہم تالان کریر و کراچی سرکلر ریلوائی نا زوت بناء کن غٹ رسمی کارروائی تے گڈیکو دروشم اس تننگ آ امنا کریر۔ اودورہ ٹی ہڑتوم آ کنڈآتا کمکاری نا وسیع امور نا احاطہ ءِ کروک آ چندی معاہدہ غاتیا دستخط نا ہم ستاءِ کرے۔ صدر شی جن پنگ باورکرفے کہ چین پائیدار اقتصادی شونداری و جیواکنامک مرکز نا وڑاٹ تینا لائخی تے کاریم اٹ اتنگ کن پاکستان نا مخ تفی ءِ برجاتخک۔ اوپاکستان اٹی نوکاپ آن پد انا امداد و بحالی نا کوشست آتیکن 500 ملین یوان نا ودکی کمکی پیکج نا ہم پڑو ءِ کرے۔ ہڑتوم آ راہشونک جہانی چاگڑد اٹی ترندی اٹ بدلی نا بارواٹی گپ وتران کریر ہرا پدتموک ملک آتیکن اقتصادی چیلنج آتے ودفینے۔ اوفک بریبری و تین پہ تینی فائدہ غا تالان گپ وتران و کمکاری آ تینا اسیجائی یقین ءِ پک کریر ہرا جہانی امن وشونہالی کن اہم ءِ۔ اوفک داہیت آ امنا کریر کہ موسمیاتی بدلی، جان جوڑی نا دینی مرض و ودوک آ بے بریبری کون آ ساڑی آ چیلنج آتیکن اقوام متحدہ نا چارٹر نا مسخت و اصول آتا رداٹ ریاست آتا نیام اٹ کمکاری نا گرج ءِ۔ وزیراعظم شہباز شریف و صدر شی جن پنگ بھارت نا غیرکانودی کوزہ گیری ٹی جموں وکشمیر و اوغانستان نا حالیت آتون اوار ڈیہہ نا بابت اہم امور آ ہم گپ وتران کریر۔ ہڑتوم آ راہشونک امنا کریر کہ اسہ پرامن و سوگو اوغانستان اس علاقائی سلامتی و اقتصادی شونداری ءِ مون آ دیک۔ اوفک داہیت آ ہم امنا کریر کہ سی پیک نا اوغانستان اسکان ودفنگ آن علاقائی رابطہ غاتا گام گیج آتے سوگوی ملک۔ وزیراعظم صدر شی جن پنگ ءِ زوت آن زوت پاکستان نا دورہ ءِ کننگ نا جم و جوش اٹ سلہ ہم خلک ہرادے او قبول کرے۔
