بیجنگ۔ 02 نومبر (اے پی پی) وزیراعظم محمد شہباز شریف نا سلہ غا پنی آ چینی کمپنیک پاکستان اٹی اسیجائی ڈٹ خاص وڑاٹ شمسی توانائی و انفراسٹرکچر نا ڈٹ آتیٹی زرکاری ٹی است خواہی نا درشانی ءِ کرسا کراچی ٹی کنوئی آ دیر انا فراوانی تون اوار ایلو بھلا ڈٹ آتیٹی زرکاری نا باوری کرفینو۔ چارشنبےنادے آ وزیراعظم محمد شہباز شریف تون چین نا صف اول نا کمپنی تا نمائندہ غاک اوڑدہی کریر۔ وزیراعظم آفس نا میڈیا ونگ آن جاری بیان نا رداٹ چینی کمپنیک پاکستان اٹی زرکاری و اسیجائی ڈٹ آتیٹی است خواہی نا درشانی ءِ کریر۔ وزیراعظم چینی کمپنی تے 10 ہزار میگاواٹ شمسی توانائی نا ڈٹ آتیا اواری اٹ کاریم کننگ نا سلہ خلک۔ وزیراعظم گوادر بالی پٹ آ کاریم نا رفتار ءِ ترند کننگ و اودے اینخو سال انا ایسر اسکان پورو کننگ آ زور شاغا۔ تعلقدار چینی کمپنی بروک آ سال انا بناٹی گوادر بالی پٹ انا تفنگ نا پوروی نا باوری کرفے۔ وزیراعظم چینی زرکار و کمپنی تا نمائندہ غاتیان تران کرسا پارے کہ او داہیت آن معلومدار ءِ کہ مستین اٹی بھاز انگا ویل ودی مس ہراڑا او معذرت خواہ ءِ۔ اوپارے کہ 11 اپریل 2022 آ اقتدار ءِ سنبھالنگ آن پد اونا حکومت چینی کمپنی تے مون تروک ویل آتے ایسرکرے۔ چینی کمپنی تے واجب الادا160 ارب روپئی نا زرتس تننگانے۔ 50 ارب روپئی تدوک آ دے ادا کننگانے و 50 ارب روپئی آن ریوالنگ فنڈ جوڑ کننگانے۔ وزیراعظم پارے کہ بنجائی وزیر خزانہ اسحاق ڈار نا پارت آ سٹیٹ بینک ریوالونگ اکاؤنٹ اس جوڑ کرینے۔ ادائیگی تتون پین 50 ارب روپئی داٹی اوار مریک۔ اوچین آن درآمد کروک آ کولانا ادائیگی تیٹی مستین اٹ پیش بروک آ ویل اآتیا است ہسونی نا درشانی ءِ کرے۔ وزیراعظم باوری کرفے کہ دیامربھاشا ڈیم ڈٹ اٹی ڈغار نا دوئی کننگ نا ویل آتے ایسر کننگک و دا ڈٹ انا کسر اٹ ہچ ءُ اڑاند اس بننگ کن الیپنہ۔ وزیراعظم چینی شاری تے شیست کننگ نا واقعہ غاتیا است ہسونی نا درشانی ءِ کرے و پارے کہ دا واقعہ غاتیٹی اوار بندغ آتے دزگیر کننگانے و اوفتے مثالی سزا ملک۔ وزیراعظم شہباز شریف باوری کرفے کہ حکومت چینی زرکارآتا رکھ اکن گچین گام گیج کیک و سی پیک و سی پیک آن بیدس ایلو ڈٹ آتیا کاریم کروک آ چینی باتی تا رکھ ءِ پک کننگک و سی پیک و سی پیک آن بیدس غٹ ڈٹ آتیا کاریم کروک آ چینی باتی تا سیکورٹی نا اسہ آب اس مقرر کننگک۔ اوپارے کہ ننے چینی ایلم و ایڑھ تا سلامتی تینا ایلم و ایڑھ تیانبار عزیز ءِ۔ وزیراعظم مہمند ڈیم نا بابت پیش بروک آ گڑاس ویل آتے ایسر کننگ نا ہم باوری کرفے۔ اوپارے کہ 2 کروڑ نا آبادی والا شار کراچی ٹی دیر انا فراوانی بھاز بھلو ویل اسے۔ بنجائی حکومت سندھ حکومت تون اواری اٹ دا ڈٹ ءِ مون آ دیک۔ اوچینی کمپنی تے معلومدار کرے کہ حکومت شمسی توانائی آن 10 ہزار میگاواٹ ودی کننگ نا جوان ءُ ڈٹ اس جوڑ کرینے۔ وزیراعظم تہو آن بجلی ودی کننگ نا ڈٹ آتیٹی ہم چینی کمپنی تے زرکاری نا سلہ خلک۔ اوپارے کہ ایندھن نا خڑچ ءِ کم کرسا تیل و گیس آ خڑچ مروک آ بھلو درملکی زرمبادلہ اسے نا بچت ءِ کننگ مریک۔ وزیراعظم پاکستان و چین نا تعلقداری تا مون آ دننگ کن چینی کمپنی تتون اواری اٹ کاریم کننگ نا عزم انا درشانی ءِ کرے و پاکستان اٹی کاریم کننگ کن است خواہی آ چینی کمپنی تا منت واری ءِ ہرفے۔ وزیراعظم پارے کہ او شش تُو اٹی مسہ وار گوادر بندرگاہ نا دورہ ءِ کرینے۔ اوایم ایل ون و ایلو ڈٹ آتیٹی است خواہی و پاکستان اٹی نوکاپ زہمی تیکن امداد آ ہم چینی حکومت و کمپنی تا منت واری ءِ ہرفے۔
