مزن  وزیر  شہباز شریف   دو روچی  سرکاری    چین ءِ تر ءُ تاب  ءِ  ھاترا  چین ءِ شہر  بیجنگ   ءَ  پج ات،  مزن  تکی  چینی کارندہ  آں آرا وش اتک کت

بیجنگ۔1نومبر  (اے پی پی): مزن  وزیر  محمد  شہباز شریف   دو روچی سرکاری  چین ءِ تر ءُ تاب ءِ ھاترا   چین  ءِ شہر  بیجنگ ءَ  پج ات۔  سئے  شمبے  ءِ روچ  ءَ  بیجنگ   ائیر پورٹ   ءِ سر ءَ   مزن وزیر محمد  شہباز شریف   ءِ  مزن  تکی  چینی کارندہ  آں  آرا وش اتک کت۔  وزیر ءِ  درئی کار  بلاول بھٹو  زرداری ، وزیر ءِ ھزانگ اسحاق  ڈر،  بنجاھی وزیر   رسانک مولانا  اسع  محمود،  بنجاھی  وزیر منصوبگ بندی   ءُ ھاسیں گامگیج   احسن اقبال ، بنجاھی  وزیر  اھوالکاری مریم اورنگزیب ،  بنجاھی  وزیر  ریلوے  / ہوا بازی خواجہ  سعد  رفیق ، بنجاھی وزیر سرمایہ کاری بورڈ چوہدری  سالک حسین ،  بنجاھی وزیر   دیمپانی پیداوار   سردار اسرار ترین، ھاسیں  کمکار طارق  فاطمی، سید فہد حسین ، ظفر الدین محمود،  جہانزیب  خان ءُ   سر وزیر   سندھ  سید  مراد  علی شاہ   مزن وزیر   ءِ  ھمبراھی  ات۔  11 اپریل  2022   ءَ  مزن وزیر  ءِ  سیٹ  ءِ  گرگ  ءَ چہ پد  مزن وزیر   شہباز شریف  ءِ  چین ءِ  اولی تر ءُ تاب  انت۔  مزن وزیر  شہباز شریف   چین ءِ ریاستی کونسل  ءِ مزن  وزیر  لی کی چیانگ  ءِ  دعوت  ءِ  پد ءَ  تر ءُ تاب ءَ  کنگ ءَ انت۔  کمیونسٹ  پارٹی  چین  ءِ  بیست می  نیشنل  کانگریس  ءِ تاریخی برجائی ءُ صدر  شی جن پنگ  ءِ سیمی  رند ءَ جنرل  سیکرٹری  گچین  بوھگ ءِ پد ءَ  مزن وزیر   شہباز شریف  چین   تر ءُتاب  کنوکیں سروک آنی   لڑ  ءَ  ھوار انت۔  مزن وزیر   شہباز شریف  ءِ   تر ءُ تاب  دوئیں ملک آنی  نیام ءَ  سروکی تک ءَ یک شلیں  رابطہ  ءِ   کڑئی  انت۔  مزن  وزیر   شہباز شریف   تر ءُ تاب ءِ سھت ءَ   چین ءِ صدر  شی  جن پنگ   ءَ گوں   گند ءُ نند کت۔  دوئیں  ملک آنی  مزن وزیر  آنی  نیام ءَ ڈل  ءِ تک  ءَ  سول ءُ تران  بنت۔  دوئیں ملک آنی سروک  سٹرٹیجک کوآپریشن  پارٹنرشپ  ءِ چار  ءُ تپاسی ءَ گرنت۔   گند ءُ نند ءُ   دیوان  آنی  تہ ءَ  دمگی  ءُ میاں اوستمانی تک ءَ جاور ھال آنی  ھوالگ ءَ  ھیال ریچی  بیت۔  تر ءُ  تاب  ءَ چہ دوئیں ملک  آنی  نیام ءَ  پراھ  ءُ شاھیگانیں  دو نیمگی  کمک  آنی ایجنڈا  آنی   سر ءَ  دیمروئی  اوست  کنگ بوتگ۔  تر ءُ تاب ءِ ساھت ءَ   بازیں وت مہ  وتی  منگ نامہ آنی سر ءَ  دست چنگل     جنگ  ءِ ھم اوست   کنگ بوھگ ءَ انت۔  مزن  وزیر ءِ    تر ءُ تاب  ءَ چہ  چین  پاکستان اقتصادی  راہداری  منصوبگ آنی سر ءَ    کار ءِ گامگیج آناں  گیش ترند   اوست کنگ بوتگ۔