بلڈ شیڈ، توفک، کرینگ و خونی انقلاب اٹ گچین کاری ملپک، عمران نیازی خواہک ملک اٹی ایمرجنسی لگے، مریم اورنگزیب

اسلام آباد۔ 01 نومبر (اے پی پی) بنجائی وزیر حوالکاری و شینکاری مریم اورنگزیب پارینے کہ بلڈ شیڈ ، توفک، کرینگ و خونی انقلاب اٹ گچین کاری ملپک، عمران نیازی خواہک ملک اٹی ایمرجنسی لگے، او ملک اٹی بے چیٹی و تقسیم ودی کننگ خواہک، اوڑآنبار ءُ آئین شکن پاکستان نا تاریخ اٹی اسُل بتنے، مسلم لیگ (ن) عمران نیازی نا دھرنہ تون مون تننگ چاہک، عمران نیازی نا لانگ مارچ اسلام آباد آ سرمننگ آن مست بوریا بستر گول مریک ، 2014ء ٹی ہم عمران نیازی چین نا صدر نا دورہ ءِ پاکستان ءِ لتاڑنگ کن کنیٹرآتیا ئسک و اینو ہم او وزیراعظم نا دورہ ءِ چین اٹی کنٹینر آتیاٹی ءِ، نئے مہالو اونا دوٹی گڑاس بس، نئے داسہ بریک۔ وزیراعظم نا دورہ ءِ چین سی پیک ڈٹ آتیکن پوسکن آ مزل نا نشان مریک۔ داخیال آتا درشانی ءِ او سے شنبےنادے آ وزیراعظم شہباز شریف نا دورہ ءِ چین و سیاسی حالیت آتیا گپ وتران کرسا کرے۔ بنجائی وزیر حوالکاری پارے کہ وزیراعظم اہم دورہ غا چین آ روانہ مسنے، چین نا اکانومسدٹ پارٹی نا راہشون شی جن پنگ مسٹ میکو وار صدر گچین مسنے و چین نا صدارتی گچین کاری تیان پد دا ہر سربراہ مملکت نا اولیکو دورہ ءِ۔ اوپارے کہ صدر شی جن پنگ نا پاکستان نا شونداری کن جوزہ غاتیا پاکستان وچین نا الس گمر کیک۔ بنجائی وزیر حوالکاری پارے کہ عمران نیازی نا چارسالہ دور اٹی سی پیک تاخیر نا گواچی مس، اونا دور اٹی جوائنٹ کوآپریشن کمیٹی (جے سی سی ) نا اسہ دیوان اس ہم متو، جے سی سی داہیت انا تعین ءِ کیک کہ ہراڈٹ آک چلینگ انگ ءُ و ہراڑاسکان سرمسنو، او ڈٹ آتا مانیٹرنگ مریک و پوسکن اوار مروک ڈٹ آتیا جے سی سی ءِ کاریم کروئی مریک۔ اوپارے کہ جے سی سی نا اِرا ہفتہ مہالو میٹنگ مسنے ہراٹی سی پیک نا ڈٹ آتا جاچ ءِ ہلنگا۔ اوپارے کہ وزیراعظم نا دورہ ءِ چین سی پیک کن اسہ مزل نا نشان مریک، سی پیک نا تاخیر نا گواچی ڈٹ ، پوسکن آ ڈٹ و مست آن برجا ڈٹ آتا بابت معاہدہ غاتیا دستخط مریک ، وزیراعظم نا دورہ چین نا بابت غٹ سرجزآک پی ٹی وی آ نشرمریرہ۔ اوپارے کہ وزیراعظم شہباز شریف چار آن پنچ تُو اٹی سی پیک نا سلوک آ ڈٹ و تاخیر نا گواچی چینی زرکاری ءِ بحال کرے، ایڈمنسٹریٹو بلاک آتے پورو کرسا سی پیک نا اسہ پوسکن ءُ دور اسے نا بنا ءِ کرے۔ اوپارے کہ صدر شی جن پنگ و مسکوہی وزیراعظم نواز شریف 2013ء ٹی ہراوژن ءِ تسوسس، او بیرہ پاکستان کن آخا بلکن مچ آ ڈیہہ کن ءِ۔ دا وژن نا رداٹ ملک انا ورناتا شونداری، اوفتے روزگار نا فراوانی و شونداری ڈٹ آتا پوروی اوار ءِ۔ وزیراعظم شہباز شریف نا دا دورہ دا چرجوئی نا اسہ کڑی اس مریک۔ بنجائی وزیر حوالکاری پارے کہ اسہ کنڈآ وزیراعظم شہباز شریف پاکستان نا سفارتی تعلقداری تے گچین کننگ و جہانی زرکاری کن چین نا دورہ غا روانہ مس و ایلو کنڈآ اسہ بندغ اس (عمران خان ) کینٹینر آ لگوک ءِ، دا بندغ 2014ء ٹی ہم صدر شی جن پنگ نا دورہ  ءِ پاکستان ءِ لتاڑنگ کن کنٹینر آ ئسک، ہمونا سوب آن سی پیک تاخیر نا گواچی مس، اینو ولدا دا بندغ کنٹینر آ سلسا تینٹ ایکسپوز مننگ ءِ۔ اوپارے کہ 2014ء ٹی ہم دا ایمپائر نا ہور انا انتظار ءِ کرسا کرسا 126 دے انا دھرنا ترسا اُرا غا ہناسس، ہمووخت آ ہم اونا دوٹی ہچ اس بتویسس۔ اوپارے کہ عمران نیازی نا تقریر آتیان مایوسی ظاہر مننگ ءِ، عمران نیازی  کرینگ، دھڑکو نا کمک اٹ مخلوق ءِ دا تاثر تننگ نا کوشست کننگ ءِ کہ بھاز بھلو حقی جنگ اس برجاءِ۔