بنجائی وزیر سائنس و ٹیکنالوجی تون قازقستان نا سفیر نا اوڑدہی

اسلام آباد۔ 01نومبر (اے پی پی) بنجائی وزیر سائنس و ٹیکنالوجی آغاحسن بلوچ تون قازقستان نا سفیر یرحان کستافین سے شنبےنادے آ داڑے اوڑدہی کرے۔ وزارت سائنس و ٹیکنالوجی نا کنڈآن جاری بیان نا رداٹ اوڑدہی ٹی برادر ملک آتا ہڑتوم آ کنڈآتا تعلقداری تے سوگو کننگ کن ڈل آتا کہو ل آ گپ وتران، اسیجائی ورکنگ ٹولی نا دیوان ومفاہمت نا یات داشت آتیا دستخط آن بیدس سائنس و ٹیکنالوجی نا بشخ اٹی پوسکنی و علاقائی رابطہ غاتے ودفنگ کن چندی گام گیج آتیا گپ وتران کننگا۔ اوڑدہی ٹی داسال دسمبر اٹی اسلام آباد اٹی اڈ ہلوک آ سائنس و ٹیکنالوجی نا بابت او آئی سی نا 15 دیوان آ ہم گپ وتران کننگا ہراٹی سائنس و ٹیکنالوجی نا غٹ آن شون ہلوک و او آئی سی ملک او آئی سی نا باسک ملک آتا نیام اٹ سائنسی و پٹ وپولی کمکاری ءِ سوگو کننگ کن ہیت کیک۔ بنجائی وزیر ڈائریکٹر جنرل پی ایس کیو سی اے و جوائنٹ سائنٹفک ایڈوائزر زین العابدین ءِ سروکی دیوان اٹی پاکستان نا نمائندگی کن گچین کرینے۔ بنجائی وزیر آغاحسن بلوچ داوخت آ گپ وتران کرسا پارے کہ سائنس ، ٹیکنالوجی، اختراعات و پٹ وپول اٹی او آئی سی نا باسک ملک آتا تین پہ تینی شریداری بھاز پراومیت و وخت انا اہم ءُ گرج اسے۔ قازقستان نا سفیر سائنس و ٹیکنالوجی ٹی پاکستان نا شونداری نا ستاءِ کرسا پاکستان تون سائنسی کمکاری ، اسہ ایلو ءِ آزموندہ غاتا ہل و تس و مفاہمت نا یات داشت آتیا دستخط کننگ نا است خواہی نا درشانی ءِ کرے۔ قازقستان نا وزارت بڑزکو تعلیم و سائنس و پاکستان نا وزارت سائنس و ٹیکنالوجی، ایچ ای سی و چندی یونیورسٹی تا نیام اٹ او آئی سی نا سلاہ ئی دیوان اٹی گپ وتران آ ہم شرہ مس۔ فریق آک سائنس، ٹیکنالوجی، اختراع و پٹ وپول نا میدان اٹ تعلقداری تے گیشتر کننگ نا تینا پکا عزم انا درشانی ءِ کرے۔ ہڑتوم آ ملک آک سائنسی کمکاری آ اولیکو وار 1999 ٹی دستخط کریسر و 2020 اٹی اودے دُوارہ بروک آ 10 سال اکن ودفنگا، اسلام آباد اٹی اڈ ہلوک آ سائنس و ٹیکنالوجی نا بابت اوآئی سی نا 15 دیوان اٹی اودے پین فعال کننگک۔