اینٹی نارکوٹکس فورس انا کارروائی ، بھلو کچ اسے ٹی منشیات دوئی

راولپنڈی۔ 01 نومبر (اے پی پی) اینٹی نارکوٹکس فورس اسلام آباد انٹرنیشنل بالی پٹ آ کارروائی و ایلو منشیات تور آپریشن تیٹی بھلو کچ اسے ٹی منشیات دوئی کرے۔ اے این ایف ہیڈکوارٹر راولپنڈی آن جاری بیان نا رداٹ اسلام آباد انٹرنیشنل بالی پٹ آ 2 جتا کارروائی کننگا سرگودھا نا ہنکینی دوبہ دار نا پڈآن 80 وخت اس کہ سوات نا ہنکینی زالبول نا پڈ آن 50 ہیرون آن پُر کیپسول دوئی کننگا ، دوبہ دار آک سعودی عرب آ ہنارہ۔ ارٹ میکو کارروائی ٹی چکوال نا ہنکینی دوبہ دار نا ٹرالی بیگ آن 1 کلو 156 گرام ہیرون دوئی کننگا۔ دوبہ دار بحرین آ ہناکہ۔ داکان بیدس باچا خان انٹرنیشنل بالی پٹ پشاور آ اسلام آباد نا ہنکینی دوبہ دار نا پڈ آن 139 ہیرون آن پُر کیپسول دوئی کننگا ، دوبہ دار بحرین آ ہناکہ۔ اسہ پین منشیات تور آپریشن اٹی رنگ روڈ پشاور نا خڑک اوغان باتی سے آن 37 کلو 200 گرام چرس دوئی کننگا۔ دوئی مروک چرس آتے فریزراٹی ڈکسا پنجاب آ اسمگل کننگاکہ۔ غٹ دوبہ دارا ٓتا برخلاف منشیات تور ایکٹ نا رداٹ مقدمہ درج کرسا جاست وپاست نا بناءِ کننگا۔