اسلام آباد۔ 01 نومبر (اے پی پی) وزیراعظم محمد شہباز شریف سے شنبے نادے آ اِرادے ئی سرکاری دورہ غا چین آ روانہ مسنے۔ وزیراعظم آفس نا میڈیا ونگ آن جاری بیان نا رداٹ وزیر خارجہ بلاول بھٹو زرداری، وزیر خزانہ اسحاق ڈار، بنجائی وزیر مواصلات مولانا اسعد محمود، بنجائی وزیر ڈٹ بندی و خصوصی گام گیج احسن اقبال، بنجائی وزیر حوالکاری مریم اورنگزیب بنجائی وزیر ریلوائی و ہوابازی خواجہ سعد رفیق، بنجائی وزیر زرکاری بورڈ چوہدری سالک حسین، بنجائی وزیر دفاعی پیدوار سردار اسرار ترین، خصوصی کمکار طارق فاطمی، سید فہد حسین، ظفرالدین محمود، جہانزیب خان و وزیراعلیٰ سندھ سید مراد علی شاہ وزیراعظم نا ڈل اٹی اوار ءُ۔ 11 اپریل 2022 آ وزارت عظمیٰ نا منصب ءِ سنبھالنگ آن پد وزیراعظم شہباز شریف نا چین نا دا اولیکو دورہ ءِ۔ وزیراعظم شہباز شریف چین نا ریاستی کونسل نا وزیراعظم لی کی چیانگ نا سلہ غا دا دورہ ءِ کننگ ءِ۔ کمیونسٹ پارٹی چین نا 20 می نیشنل کانگریس نا تاریخی اڈ تننگ و صدر شی جن پنگ نامسٹ میکو وار جنرل سیکرٹری گچین مننگ آن پد وزیراعظم شہباز شریف چین نا دورہ ءِ کروک آ اولیکو راہشون تیٹی اوار ءِ۔ وزیراعظم شہباز شریف نا دورہ ہڑتوم آ ملک آتا نیام اٹ تعلقداری تا کہول آ پدریسہ رابطہ غاتا کڑی اسے۔ وزیراعظم شہباز شریف دورہ ٹی چین نا صدر شی جن پنگ تون اوڑدہی کیک۔ ہڑتوم آ ملک آتا وزیراعظم تا نیام اٹ ڈل آتا کہول آ مذاکرات مریک ۔ ہڑتوم آ ملک آتا سرکڑدہ غاک سٹریٹجک کوآپریشن پارٹنر شپ نا جاچءِ ہلیرہ۔ اوڑدہی و دیوان تیٹی علاقائی و جہانی کہول آ حالیت آتیا ہم گپ وتران مریک۔ دورہ غان ہڑتوم آ ملک آتا نیام اٹ گیشتر ہڑتوم آ کنڈآتا کمکاری نا ایجنڈا غا پیش رفت گمانی ءِ۔ دورہ ٹی مفاہمت نا چندی یات داشت و معاہدہ غاتیا دستخط مننگ نا ہم گمان ءِ۔ دورہ غان چین پاکستان اقتصادی راہداری نا رفتار نا پین ودنگ نا گمان ءِ۔ سی پیک نا بابت اسیجائی کمکار کمیٹی (جے سی سی ) نا یانزدہ می دیوان 27 اکتوبر 2022 آ اڈہلکوسس۔
