اسلام آباد۔ 01 نومبر (اے پی پی) وزیراعظم محمد شہباز شریف تون جہانی شربت جوڑ کروک کمپنی پیپسی کو نا چیف ایگزیکٹیو اآفیسر افریقا، دے ٹک نیامی و سویلی ایشیا یوجین ولیم سن نا کماشی ٹی ڈل اوڑدہی کرے۔ سے شنبےنادے آ وزیراعظم آفس نا میڈیا ونگ آن جاری بیان نا رداٹ اوڑدہی ٹی بنجائی وزیر صنعت و پیدوار مخدوم مرتضیٰ محمود ہم ساڑی ئسک۔ وزیراعظم ڈل ءِ بخیر کرسا پارے کہ قومک زرگزرانی پالیسی تا چرجوئی اٹ جوڑ مریرہ۔ وزیراعظم پیپسی کو نا پاکستان آن ڈیہہ نا ایلو ملک آتیٹی برآمد آتا ستاءِ کرسا کمپنی ءِ پاکستان اٹی کشاری صنعت اٹی زرکاری ءِ ودفنگ نا ترغیب تس۔ یوجین ولیم سن حکومت نا کاروبار دوست پالیسی تیا وزیراعظم نا منت واری ءِ ہرفے۔ داکان بیدس حکومت نا زرگزرانی، کاروباری و زرکاری نا پالیسی تا چرجوئی نا کوشست آتا ہم ستاءِ کرے۔ یوجین ولیم سن وزیراعظم ءِ مستی پارے کہ پیپسی کو نوکاپ زہمی تیکن 50 لکھ راشن پیکٹ فراوان کرے وخت اس کہ مچ آ دنیا ٹی پیپسی کو نا ملازم آتا کنڈآن نوکاپ زہمی تا کمک کن عطیہ یکجا کننگ نا مہم ہم برجاءِ۔ وزیراعظم پیپسی کو نا کنڈآن دا کمک نا منت واری ءِ ہرفے و کمپنی نا کنڈآن کشت وکشار نا بشخ اٹی جدت اتنگ کن زرکاری نا ستاءِ کرے۔
