اسلام آباد۔ 01 نومبر (اے پی پی) وزیراعظم شہباز شریف اِرادے ئی سرکاری دورہ غا اینو (سے شنبےنادے آ) چین آ روانہ مریک۔ وزیراعظم آفس نا میڈیا ونگ آن جاری بیان نارداٹ 11 اپریل 2022 آ وزارت عظمیٰ نا منصب ءِ سنبھالنگ آن پد وزیراعظم شہباز شریف نا چین نا دا اولیکو دورہ ءِ۔ وزیراعظم شہباز شریف چین نا ریاستی کونسل نا وزیراعظم لی کی چیانگ نا سلہ غا دادورہ ءِ کننگ اٹی ءِ۔ کمیونسٹ پارٹی چین نا 20 می نیشنل کانگریس نا تاریخی اڈتننگ و صدر شی جن پنگ نا مسٹ میکو وار جنرل سیکرٹری گچین مننگ آن پد وزیراعظم شہباز شریف چین نا دورہ ءِ کروک آ اولیکو راہشون تیٹی اوار ءِ۔ دادورہ ٹی وزیراعظم شہباز شریف تون اوار بڑزکو کہول انا ڈل اس ہم مریک۔ وزیراعظم شہباز شریف نا دورہ ہڑتوم آ ملک آتا نیام اٹ سرکڑدہ غاتا کہول آ پدریسہ رابطہ غاتا کڑی اسے۔ وزیراعظم شہباز شریف دورہ ٹی چین نا صدر شی جن پنگ تون اوڑدہی کیک۔ ہڑتوم آ ملک آتا وزیراعظم تا نیام اٹ ڈل آتا کہو آ مذاکرات مریک۔ ہڑتوم آ ملک آتا سرکڑدہ غاک سٹریٹجک کوآپریشن پارٹنر شپ نا جاچ ءِ ہلیرہ۔ اوڑدہی و دیوان تیٹی علاقائی و جہانی کہول آ حالیت آتیا ہم گپ وتران مریک۔ دورہ غان ہڑتوم آ ملک آتا نیام اٹ گیشتر ہڑتوم آ کنڈآتا کمکاری نا ایجنڈا غا پیش رفت گمانی ءِ۔ دورہ ٹی مفاہمت نا چندی یات داشت و معاہدہ غاتیا دستخط مننگ نا ہم گمان ءِ۔ دورہ غان چین پاکستان اقتصادی راہداری نا رفتار پین ودنگ نا گمان ءِ۔ سی پیک نا بابت اسیجائی کمکار کمیٹی (جے سی سی ) نا یانزدہ می دیوان 27 اکتوبر 2022 آ اڈ ہلکوسس۔
