اسلام آباد۔ 31 اکتوبر (اے پی پی) وزیراعظم محمد شہباز شریف پارینے کہ پاکستان و چین نا نیام اٹ واپار نا مون آ دننگ نا بھلو وارخواہی اس ساڑی ءِ، سی پیک پاکستان کن گیم چینجر ڈٹ اسے، چین نا کمک اٹ نن تینا برآمد آتے ودفنگ کینہ، اقتصادی زون تیٹی زرکاری و خلقی آ علاقہ غاتیٹی کشاری صنعت آتیان ملکی برآمد آتیٹی ودکی مریک، چین نا دورہ غان ہڑتوم آ ملک آتا نیام اٹ سنگتی و کمکاری ءِ مون آ دننگ دوئی مریک۔ داخیال آتا درشانی ءِ او دوشنبےنادے آ داڑے پاکستان چائنا بزنس اینڈ انویسٹمنٹ فورم نا دود آن تران کرسا کرے۔ وزیراعظم پارے کہ اولیکو پاکستان چائنا بزنس اینڈ انویسٹمنٹ فورم نا اڈتننگ آ مبارکبادی ایتیوہ و پرااومیت اُٹ کہ دا فورم ہڑتوم آ ملک آتا نیام اٹ واپار نا مون آ دننگ اٹ اہم ءُ کڑد اس ادا کیک۔ وزیراعظم پارے کہ او سےشنبے نادے آ چین نا دورہ غا روانہ مننگ ءِ ہراڑے چین نا صدر شی جن پنگ، وزیراعظم لی کی چیانگ و ایلو چینی کمامدار آتون واپاری، سٹریٹجک و دودوربیدگی تعلقداری تے سوگو کننگ کن تعمیری و فائدہ ئی گپ وتران مریک ۔ ہڑتوم آملک آتا کاروباری تعلقداری تا بابت سی پیک اسہ گیم چینجر ڈٹ اسے۔ سی پیک نا رداٹ چین پاکستان اٹی ارب آ روپئی نا زرکاری کننگ ءِ۔ چینی زرکاری ٹی پاکستان اٹی توانائی نا تنکی چٹا۔ پاکستان نا صنعت و کشت وکشار نا بشخ اٹی ہم چینی زرکاری نا سوب آن گچینی بننگ ءِ۔ اوپارے کہ وخت بسنے کہ ہڑتوم آ ملک آک تینا کاروباری تعلقداری تے پین سوگو کیر۔ داڑان سی پیک نا بھرم آک ودرہ و اسہ ایلو تون کاروباری رابطہ غاتے ہم مون آ دننگ ملک۔ وزیراعظم پارے کہ پاکستان و چین اٹی تین پہ تینی واپار نا بے شمار گمان ساڑی ءِ۔ چین دنیا نا ارٹ میکوبھلو زرگزران و پاکستان اٹی غٹ آن بھلا زرکار ملک ءِ۔ پاکستان ءِ ہم چین ءِ تینا برآمد آتے ودفنگ نا گرج ءِ۔ چین نا ہائی ٹیک انڈسٹری پاکستان اقتصادی زون تیٹی تینا صنعت آتے خلے انتئے کہ پاکستان اٹی افرادی قوت اڑزان ءِ و پاکستانی و چینی کمپنی تیکن داڑے بریبر وارخواہی مریک۔ او تینا پیدوار ءِ ودفسا دنیا ءِ برآمد کننگ کیک۔ وزیراعظم پارے کہ پاکستان اٹی کشت وکشار نا بشخ ءِ پوسکن آ وڑوڈول آتیا اتنگ نا گرج ءِ۔ فی ایکڑ پیدوار ءِ ودفنگ کن نن چین نا آزموند ہ آن فائدہ ہرفنگ کینہ۔ خلقی علاقہ غاتیٹی کشت وکشار آ تالان صنعت خلنگ آن دے ٹک نیامی و ایلو ملک آتیکن برآمد آتے ودفنگ مریک۔ چین کن برآمد آتیٹی ودکی ننا اولیت ءِ۔ ہڑتوم آ ملک آک زرکارآتیکن واپار نا گچین وارخواہی ودی کننگ ءُ۔ ہڑتوم آ ملک آتا کاروباری کمپنی تیکن بریبر وارخواہی تیان اوفتا پیدواری لائخی ٹی ہم گچینی بریک۔ چین نا حکومت 70 کروڑ بندغ آتے نیزگاری نا لکیر آن کشانے۔ ننے چین نا شونداری نا ماڈل آن فائدہ و اوڑا پورو وڑاٹ عمل کروئی مریک۔ کنا چین نا دورہ غان ہڑتوم آ کنڈآتا اقتصادی و واپاری رابطہ غاتے مون آ دننگ و برآمد آتیٹی ودکی نا مسخت اٹی پیش رفت مریک۔ وخت کس اسے نا انتظار ءِ کپک۔ ننے دوئی وارخواہی تیان فائدہ ہرفوئی مریک۔ چین نا حکومت و الس ہرمشکل ساہت اٹی پاکستان تون تفینو ہراڑا اوفتا منت وار اُن۔ نوکاپ زہمی تیکن چین پبی امداد کرے وبیجنگ و اسلام آباد نا نیام اٹ ایئربرج اس جوڑ کرینے۔ تمبو، خور، و میڈیکل ٹیم دانگیا گدریفنگا۔ چینی حکومت، کمپنی، الس و انفرادی کہول آ نوکاپ زہمی تا کمک اٹ ہڑتوم آ ملک آتا سوگو سنگتی نا ڈیک مریک۔ داوخت آ بنجائی وزیر زرکاری بورڈ چوہدری سالک حسین پارے کہ پاکستان و چین سٹریٹجک شریدار ءِ۔ ہڑتوم آ ملک آتا تعلقداری جیو پالیٹکس آن جیو اکنامک نا کنڈا ہِننگ ءُ۔ سی پیک نا ارٹ میکو ریسہ غان صنعتی سرجز آک ودرہ و زرکاری ٹی ودکی مریک۔ پاک چائنا بزنس اینڈ انویسٹمنٹ فورم نا ویب سائٹ آن زرکاری کن معلومداری و دا چرجوئی ٹی ہروڑنا اڑاند آتے مر کننگ اٹ کمک رسینگک۔ بنجائی وزیر ڈٹ بندی احسن اقبال پارے کہ چین و پاکستان آئرن ایلم ءُ و داسہ ننے تینا دا تعلقداری تے سوگو اقتصادی شریداری ٹی بدل کننگ ءِ۔ سی پیک نا سوب آن 2013 آن پد 3 سال اٹی چین پاکستان اٹی زرکاری کروک آ ملک آتیٹی اولیکو نمبر آ بسوسس۔ داسہ ننے چینی زرکاری ٹی ودکی نا ہدف دُوارہ دوئی کروئی مریک۔ چین برآمد آتے ودفنگ اٹ پاکستان نا کمک ءِ کننگ کیک۔ ننے چین اکن ہم تینا برآمد آتے ودفوئی مریک۔ زرکاری و برآمد آتیٹی ودکی نا کسر اٹی اڑاند و روڈ بلاک آتے چٹفوئی مریک۔ نوکاپ زہمی تا امداد کن چین نا منت واراُن۔ پاکستان اٹی چین نا سفیر نونگ رونگ داوخت آ پارے کہ پاکستان اٹی نوکاپ آن بھلو جانی و مالی نسخان مسنے۔ چین نا صدر و وزیراعظم پاکستان نا صدر و وزیراعظم کن ہمدردی نا کلہو اس گدریفینے و 644 ملین یوآن نا کمکی گڑافراوان کرینے۔ ہڑتوم آ ملک آک ہڑتوم آ کنڈآتا کمکاری ءِ مون آ دننگ کن گام گیج کننگ ءُ۔ سی پیک نا اولیکو ریسہ ٹی بنداوی پنجر، توانائی و سڑک آتا ڈٹ آتیا کاریم بناکرے۔ داسہ سی پیک مون نا ریسہ ٹی داخل مسنے ہراٹی کشت وکشار و صنعتی سرجز آتا مون آ دننگ آ چکار کننگک۔ وزیراعظم شہباز شریف نا چین نا دورہ غان ہڑتوم آ ملک آتا رابطہ غاتے مون آ دننگک۔ دا دورہ ہڑتوم آ ملک آتا تعلقداری تے پوسکن آ بڑزی تسکان دننگ اٹ کمک ایتک۔
