اسلام آباد۔ 31 اکتوبر (اے پی پی) وزیراعظم شہباز شریف (پگہ) یکم نومبر آ چین آ روانہ مریک۔ 11 اپریل 2022 آ وزارت عظمیٰ نا منصب ءِ سنبھالنگ آن پد وزیراعظم شہباز شریف نا چین نا دا اولیکو دورہ ءِ۔ وزیراعظم آفس میڈیا ونگ آن جاری بیان نا رداٹ وزیراعظم شہباز شریف چین نا ریاستی کونسل نا وزیراعظم لی کی چیانگ نا سلہ غا دا دورہ ءِ کننگ اٹی ءُ۔ چین نا صدر شی جن پنگ و وزیراعظم شہباز شریف اتون ازبکستان اٹی 16 ستمبر 2022 آ اوڑدہی مسوسس، کمیونسٹ پارٹی چین نا 20 می نیشنل کانگریس نا تاریخی اڈتننگ و صدر شی جن پنگ نا مسٹ میکو وار جنرل سیکرٹری گچین مننگ آن پد وزیراعظم شہباز شریف چین نا دورہ ءِ کروک آ اولیکو راہشون تیٹی اوار ءِ، بڑزکو کہولی ڈل ہم وزیراعظم شہباز شریف تون اوار مریک۔ وزیراعظم شہباز شریف نا دورہ ہڑتوم آ ملک آتا نیام اٹ سرکڑدہ غاتا کہول آ پدریسہ رابطہ غاتا کڑی اسے، وزیراعظم شہباز شریف دورہ ٹی چین نا صدر شی جن پنگ تون اوڑدہی کیک، ہڑتوم آ ملک آتا وزیر اعظم آتا نیام اٹ ڈل آتا کہول آ مذاکرات مریک۔ ہڑتوم آ ملک آتا سرکڑدہ غاک سدابہار آزموندہ سٹریٹجک کوآپریشن پارٹنر شپ نا جاچ ءِ ہلیرہ ، اوڑدہی و دیوان تیٹی علاقائی و جہانی کہول آ حالیت آتیا ہم گپ وتران مریک، دورہ غان ہڑتوم آ ملک آتا نیام اٹ گیشتر ہڑتوم آ کنڈآتا کمکاری نا ایجنڈا غا پیش رفت گمانی ءِ ، دورہ ٹی مفاہمت نا چندی یات داشت و معاہدہ غاتیا دستخط مننگ نا ہم گمان ارے۔ دورہ غان چین پاکستان اقتصادی راہداری نا رفتار پین ودنگ نا گمان ءِ، سی پیک نا بابت اسیجائی کمکار کمیٹی (جے سی سی ) نا یانزدہ می دیوان 27 اکتوبر 2022 آ اڈ ہلکوسس۔
