اسلام آباد۔ 31 اکتوبر (اے پی پی) وزیراعظم محمد شہباز شریف یکم و 2 نومبر آ چین نا دورہ ءِ کیک، وزیراعظم ءِ دا دورہ نا سلہ ءِ عوامی جمہوریہ چین نا ریاستی کونسل نا وزیراعظم لی کی چیانگ خلکنے۔ دفترخارجہ نا ترجمان نا کنڈآن جاری بیان نا رداٹ اینخو سال اپریل اٹی وزارت عظمیٰ نا عہدہ ءِ سنبھالنگ آن پد وزیراعظم محمد شہباز شریف نا چین نا اولیکو دورہ مریک، وزیراعظم 16 ستمبر 2022 آ ازبکستان اٹی چین نا صدر شی جن پنگ تون اوڑدہی کریسس۔ چین نا کمیونسٹ پارٹی نا تاریخی 20 می نیشنل کانگریس نا دیوان آن پد وزیراعظم چین نا دورہ ءِ کروک آ اولیکو راہشون تیٹی اوار ءِ۔ بیان نا رداٹ وزیراعظم نا دورہ ءِ پاکستان و چین نا نیام اٹ سرکڑدہ غاتا کہول انا دورہ غاتا چرجوئی نا درشانی اسے۔ وزیراعظم دورہ ءِ چین اٹی صدر شی جن پنگ تون اوڑدہی کیک و وزیراعظم لی کی چیانگ تون ڈل آتا کہول آ گپ وتران کیک۔ وزیراعظم محمد شہباز شریف نا دورہ ٹی فریق آک تین پہ تینی اسٹریٹجک کمکاری نا شریداری نا جاچ ءِ ہلیرہ و علاقائی و جہانی پیش رفت آ گپ وتران کیرہ۔ بیان اٹی مستی پاننگانے کہ دا دورہ ٹی چندی بشخ آتیٹی مفاہمت نا چندی یات داشت و معاہدہ غاتیا دستخط گمانی ءِ وخت اس کہ بھلو کچ اسے آ ہڑتو م آ کنڈآتا کمکاری نا ایجنڈا ءِ مون آ دننگ و سی پیک جوائنٹ کوآپریشن کمیٹی نا 27 اکتوبر آ مروک آ 11 می دیوان نا رداٹ سی پیک ڈٹ آ کمکاری نا رفتار ءِ سوگو کننگ نا ہم گمان ءِ۔
