بیجنگ۔ 31 اکتوبر (اے پی پی) پاکستان شنگھائی ٹی 5 می جہانی درآمد آتا نمائش (سی آئی آئی ای) کن آن لائن نیشنل پویلین اس جوڑ کرینے۔ پنچ میکو چائنا انٹرنیشنل امپورٹ ایکسپو 5 نومبر آن بناکرسا 10 نومبر اسکان برجاسلک۔ پاکستان نا ٹریڈ ڈویلپمنٹ اتھارٹی (ٹی ڈی اے پی) نا رداٹ پاکستان نا واپاری ہن و بر، زرکاری ناچاگڑد و وارخواہی، صنعتی خاصیت و سیل و سوات آ آن لائن نیشنل پویلین اٹی وارخواہی تیان فائدہ ہرفنگ کن پاکستان ءِ مون آ بروک آ مارکیٹ نا وڑاٹ پیش کننگانے۔ چین اٹی پاکستان نا سفیر معین الحق چینی ویب سائٹ چائنا اکنامک نیٹ ءِ تروک آ خصوصی انٹرویو ٹی پارے کہ نن چندی واپاری نمائش خاص وڑاٹ نومبر اٹی شنگھائی ٹی مروک آ چائنا انٹرنیشنل امپورٹ ایکسپو ٹی بشخ ہلنگ نا چاری اُن۔ ٹی ڈی اے پی نا اسہ حوالی اس پارے کہ پاکستان اٹی 60 ملین آن زیات افرادی قوت نا اسہ بھلو کوڑی اسے و ٹیل فون صارف آتا کچ 150 ملین آن زیات ءِ۔ داکان بیدس پاکستان کشت وکشار، ٹیکسٹائل ، فٹ ویئر، دواجوڑ کننگ، گوازی تا گڑا، پیکجنگ ، این و اشٹیل نا بابت جہانی منڈی ٹی اہم شریدار آتیان اسٹ ءِ۔ پاکستانی سفیر پارے کہ دا پلیٹ فارم آن فائدہ ہرفسا نن چین و دنیا تون تینا واپار ءِ ودفنگ کن کاریم کننگ اٹی اُن، چین مہالو آن پاکستان نا غٹ آن بھلا واپاری شریدار ءِ و تدوک آ سال ہڑتوم آ کنڈآتا واپاری کچ اٹی ریکارڈ ودکی مس وخت اس کہ سی آئی آئی ای کون آ اہم پلیٹ فارم تیان چین پاکستان واپار و زرکاری ٹی ودوک آ کمکاری نا سوب آن ساڑی آ سال تیٹی چین ءِ پاکستان نا جم برآمد آتیٹی پدریسہ ودکی مسنے۔ سی آئی آئی ای مچ آ دنیا نا کمپنی تیکن چین اٹی اسہ ہندن ءُ پلیٹ فارم اسے ہراڑے کمپنیک تینا مصنوعات آتا نمائش، تینا برانڈ ءِ مون آ دننگ و پین کاروباری شریدار مننگ نا وارخواہی فراوان کیک۔ سی آئی آئی ای ساڑی ہی ٹی آن لائن قومی نمائش و ڈیجیٹل سی آئی آئی آئی ای پلیٹ فارم نا کلاؤڈ چرجوئی نا بناءِ کرینے۔ چائنا انٹرنیشنل امپورٹ ایکسپو بیورو نا ڈپٹی ڈائریکٹر جنرل سون چنگ ہائی پارے کہ آن لائن نمائش نا آزموندہ ئی آپریشن اٹی 30 ملک آک بشخ ہلکنو و دا پلیٹ فارم ذاتی حیثیت اٹ بشخ ہلنگ نا پیشکش کن تیار ءِ۔
