اسلام آباد۔ 31 اکتوبر (اے پی پی) بنجائی وزیر قومی جان جوڑی عبدالقادر پٹیل پارینے کہ مچ آ ملک اٹی 5 آن 11 سال انا وئی نا چناتے کورونا دین آن رکھ تخنگ کن حکومت پاکستان کوویڈ۔ 19 ویکسی نیشن مہم نا ارٹ میکو ریسہ نا بناءِ دوشنبے آن کننگانے ہرا 5 نومبر اسکان برجاسلک۔ دوشنبے نادے آ کوویڈ۔ 19 ویکسی نیشن مہم نا بنانا وخت آ تینا خصوصی و یڈیو کلہو اٹی او پارے کہ چناک قوم انا آخبت آک ءُ و جان جوڑی چنا جان جوڑ پاکستان نا نشانی ءِ۔ اوپارے کہ اولیکو سرسہب مہم نا مثبت بھرم مون آ بننگ آن پد داسہ فیصلہ کننگانے کہ ننے تینا چناتے کورونا دین آن رکھ تخنگ کن ویکسی نیشن نا ارٹ میکو ریسہ ٹی لمہ و باوہ غاتیان خواست ءِ کہ او تینا چناتے پولیو ویکسین ضرور کرفر تانکہ چناتے رکھ کرسا خاہوت نا ایلو بندغ آتے ہم کورونا غان بچفنگ مرے۔ وزیر جان جوڑی پارے کہ مچ آ ملک اٹی چناتے کوویڈ۔ 19 آن بچفنگ نا ویکسی نیشن نا دا مہم 5 نومبر اسکان برجاسلک، دا مہم پنجاب، سندھ و اسلام آباد نا گچین مروک ضلع غاتیٹی بیک وخت بناکننگ انگ ءِ۔ اوپارے کہ ننا چناک ننا آخبت آک ءُ جان جوڑی چناجان جوڑ پاکستان نانشانی ءِ، ویکسین چناتے کورونا غان رکھ تخنگ و اوفتیان ایلوفتسکان دین انا رسینگ ءِ کم کننگ نا گچین ءُ ذریعہ اسے۔ بنجائی وزیر پارے کہ عالم دین، استاد، میڈیا، سول سوسائٹی و راج انا یلو غٹ مکتبہ فکر آن تعلق تخوک آ بندغ آک دا مہم نا سرسہبی کن تینا کڑد ءِ ادا کیر۔ عبدالقادر پٹیل پارے کہ الس ءِ ناجوڑی تیان رکھ فراوان کننگ کن غٹ تر المی گام گیج آتے پک کننگ انگ ءِ۔ حکومت جان جوڑی نا بشخ اٹی گچینی اتنگ کن عملی گام گیج آتے پک کننگ کن غٹ تر وسیلہ غاتے کاریم اٹ اتنگ ءِ۔
