وزیراعظم شہباز شریف تون مصر انا سفیر نا اوڑدہی، COP-27کانفرنس نا اڈتننگ آ گپ وتران

اسلام آباد۔ 27 اکتوبر (اے پی پی) وزیراعظم محمد شہباز شریف پاکستان و مصر انا نیام اٹ اقتصادی بشخ اٹی کمکاری ءِ ودفنگ نا گرج آ زور شاغسا پارینے کہ ہڑتوم آملک آتا سرکڑدہ و گیشتر السی و ادارہ جاتی رابطہ غاتا مون آ دننگ بھاز اہم ءِ۔ وزیراعظم آفس نا میڈیا ونگ آن جاری بیان نا رداٹ اوداخیال آتا درشانی ءِ جمہوریہ مصر انا سفیر طارق محمد دھروج تون گپ وتران کرسا کرے ہرا پنچ شنبےنادے آ داڑے اوڑتون اوڑدہی کرے۔ اوڑدہی ٹی پاکستان ومصر تعلقداری تے پین سوگو کننگ ومصر اٹی بروک آ تُوCOP-27کانفرنس نا اڈتننگ نا بابت آ گپ وتران کننگا۔ مصر انا صدر عبدالفتاح السیسی تون ٹیل فون آ تینا گپ وتران نا ذکر ءِ کرسا وزیراعظم پاکستان اٹی چاگڑدی بدلی تا سوب آن بھسکار نوکاپ آن ودی مروک آ حالیت آتیا مصر انا مخ تفی و یکجہتی نا درشانی نا ستاءِ کرے۔ وزیراعظم مصر انا شار شرم الشیخ اٹی COP-27کانفرنس نا مہمانداری آ مصری حکومت ءِ مبارکبادی تس و پارے کہ او ’’چاگڑدی بدلی و نزور تپہ غاتا بابت بڑزکو کہولی گول میز کانفرنس‘‘ نا اسیجائی کماشی تون اوار فعال بشخ ہلنگ نا چاری ءِ۔ پاکستان COP-27کانفرنس اٹی ٹولی 77 و چین نانمائندگی ءِ ہم کیک ۔ وزیراعظم پاکستان ومصر انا نیام اٹ اقتصادی بشخ اٹی کمکاری ءِ ودفنگ و ہڑتوم آ کنڈآتا سرکڑدہ، الس تون الس و ادارہ جاتی رابطہ غاتے ودفنگ نا اہمیت آ زور شاغا۔ پاکستان و مصر انا نیام اٹ اسیجائی قدر و نکتہ نظر آ تالان خڑکی و خوشگوار تعلقداری ءِ۔ ہڑتوم آ ملک آک ہڑتوم آ کنڈآتا و تین پہ تینی است خواہی نا علاقائی وجہانی امور آ اسہ ایلو تون خڑکی کمک کیرہ۔